Fınlıandııanyń Rýka taý-shańǵy kýrortynda frıstaıldyń akrobatıka, mogýl túrlerinen álem kýboginiń birinshi kezeńi ótti. Bul – reıtıngtik týrnır. Kelesi jyldyń aqpan aıynda Italııada uıymdastyrylatyn qysqy Olımpııa oıyndaryna joldama alý jolynda sportshylar reıtıngtik upaı jınaýǵa umtyldy. Frıstaıl-mogýl jattyǵýynan irikteý kezeńinde súrinbegen Anastasııa Gorodko (67,11 upaı, 9-oryn), Aıaýlym Ámirenova (62,41 upaı, 16-oryn) úzdik 16 sportshynyń qataryna ótken edi. О́kinishke qaraı, medal buıyrmady. Gorodko – 7, Ámirenova 15-oryndy mise tutty. Álem kýboginiń birinshi kezeńindegi irikteý saıysynda Iýlııa Galysheva – 17, Iýlııa Feklıstova – 29, Anton Bondarev – 37 , Maksım Emelıanov – 34, Pavel Kolmakov 14-oryndy mise tutty. Frıstaıl-akrobatıkadan Ulanbákir О́mirzaqov – 26, Dinmuhammed Raıymqulov – 23, Asan Asylhan – 14, Sherzod Hashırbaev – 17, Ardana Mahanova 28-satyǵa ornyǵyp, júldeniń aýylyna mańaılaı almady.
Konkımen júgirýden jasópirimder arasynda álem kýboginiń kezeńi máresine jetti. Italııanyń Kollalbo qalasynda ótken saıysta jerlesterimizdiń mereıi ústem boldy. Ásirese Krıstına Shýmekova 1000, 1500, 3000 metr qashyqtyqta qarsylastaryn shań qaptyryp, 3 altyn medal oljalady. Alına Daýranova 500 metrge júıtkýde top jarsa, Inessa Shýmekova kúmis júldeger atandy. 1000 metrge júgirýde qyzdar arasynda Darıa Vajenına, erler synynda Dmıtrıı Osıpenko kúmis medal ıelendi. Bul qashyqtyqta A.Daýranova men Andreı Semıonovqa qola medal buıyrdy. D.Osıpenko 1 500 metrge júgirýden de qola júlde aldy. Mass-start dodasynda Abylaıhan Qaıyrǵazy márege ekinshi bolyp jetip, kúmispen kúpteldi.