Jasandy ıntellekt jáne sıfrlyq damý mınıstrligi Bas prokýratýramen birlesip memlekettik onlaın-servısterge kirý erejelerin kúsheıtti. Sharalar telefon arqyly jasalatyn alaıaqtyqtyń aldyn alýǵa baǵyttalǵan, dep jazady Egemen.kz.
Buǵan deıin birqatar aqparattyq júıege qol jetkizý úshin azamat tek telefon nómirin engizip, 1414 qysqa nómirinen kelgen bir rettik SMS-kodty paıdalana alatyn. Bul syzbany qylmyskerler óz paıdasyna jıi qoldanǵany anyqtalǵan. Olar jábirlenýshiniń nómirin bilip, júıege kirý áreketin bastap, rastaý kodyn túrli tásilmen qolǵa túsirip otyrǵan.
Mınıstrliktiń málimetinshe, endi mundaı yqshamdalǵan kirý formasy tolyqtaı óshirildi. 2025 jylǵy jeltoqsannan bastap 1414 shlıýzin paıdalanǵan barlyq aqparattyq júıelerge qaýipsiz aýtentıfıkasııa ádisterin engizý mindetteldi. Talapty oryndamaǵan servıster júıeden ajyratylǵan.
Qazirgi ýaqytta 1414 nómirin qoldanǵan júıelerge kirý úsh qaýipsiz tásil arqyly ǵana múmkin:
• FaceID arqyly bıometrııalyq aýtentıfıkasııa, • Elektrondy sıfrlyq qoltańba (ESQ), • Arnaıy eGov QR-kody.
Bul ózgerister telefon nómiri arqyly ruqsatsyz kirý yqtımaldyǵyn tolyǵymen joıýǵa jáne azamattardyń jeke derekterin qorǵaýǵa baǵyttalǵan.
Mınıstrlik halyqty aqparattandyrý sharalaryn da júrgizip jatyr. eGov Mobile qosymshasynda basty betke aqparattyq bannerler ornalastyrylǵan. Onda alaıaqtyq shemalardy taný, kıberqaýipsizdik erejelerin saqtaý jáne sıfrlyq servısterdi durys paıdalaný jóninde usynymdar berilgen.
Júzege asyrylyp jatqan barlyq sharalar «Zań jáne tártip» tujyrymdamasy aıasynda iske asyrylady jáne sıfrlyq ortadaǵy quqyqtyq tártipti nyǵaıtýǵa, sondaı-aq memlekettik onlaın-qyzmetterge degen senimdi arttyrýǵa baǵyttalǵan.