Dýbaıda (BAÁ) erler arasyndaǵy álem chempıonaty máresine taıady. Tórtkúl dúnıeden jınalǵan bylǵary qolǵap sheberleri báıgesi qomaqty dodanyń júldeleri úshin tartysqa túsip jatyr. Búgin fınaldyq jekpe-jekter ótedi.
Barlyq salmaq dárejesinde (13) tórt kózi túgel jartylaı fınalǵa jetken tek Reseı quramasy ǵana. Bizdiń jeti jampozymyz júldege synyq súıem jetpeı dodany doǵarsa, alty sańlaq júldegerler sanatyna qosyldy.
О́kinishke qaraı, Serik Temirjanov (60 kg) tájikstandyq Akmal Ýbaıdovtan 0:5, Erasyl Jaqpekov (80 kg) reseılik Jambolat Bıjamovtan 1:4, Dáýlet Tólemisov (86 kg) álem chempıony ózbek boksshysy Akmaljon Isroılovtan 0:5 esebimen jeńildi. 92 kg salmaqta synǵa túsken Nurmaǵamed Iýsýpov ıspan boksshysy Emanýel Reıesten asa almady. Asa aýyr salmaqta synǵa túsken Nurlan Saparbaı Armenııa ókili Davıd Chaloıannan jeńildi. Álemdik alamanǵa qosylǵan boksshylarymyzdyń ishinde Sanatáli Tóltaevqa (67 kg) da zor senim artylǵan edi. Buǵan deıin talaı dodaǵa túsip, shyńdalǵan boksshy, Parıj jazǵy Olımpıadasynyń jeńimpazy, eki dúrkin álem chempıony ózbekstandyq Asahýja Mýdınhýjaevqa ese jiberdi. 51 kg salmaqta dodaǵa qosylǵan Danııal Sábıt zambııalyq Patrık Chınembadan jeńildi.
Jartylaı fınalǵa shyqqan alty boksshymyzdyń tórteýi fınalǵa ótti. Endi olar altyn medal úshin tartysqa túsedi. Álem chempıony Temirtas Júsipov (48 kg) reseılik Edmond Hýdoıanmen kúsh synasyp, 0:5 esebimen ese jiberdi. Osylaısha, 37 jastaǵy Temirtas Dýbaıdan qola medalmen oraldy. Álem chempıony, Tokıo jazǵy Olımpıadasynyń qola júldegeri Sáken Bıbosynov (54 kg) Nepal boksshysy Chandra Bahadúrdi talassyz jeńdi. Endi eki dúrkin álem chempıony ataǵy úshin reseılik Vıacheslav Rogozınmen judyryqtasady. 57 kg salmaqta Orazbek Asylqulov fınalǵa shyǵar jolda Reseı boksshysy Andreı Peglıvanıandy jeńdi. Sońǵy synda tájikstandyq Hýsravhon Rahımovpen aıqasady. Ertýǵan Zeınýlınov (63,5 kg) Reseı boksshysy Ilıa Popovpen judyryqtasqan, tóreshiler 3:4 esebin tirkep, qarsylasyn fınalǵa ótkizdi. Álem chempıonatynyń úsh dúrkin qola júldegeri Abylaıhan Júsipov (71 kg) qyrǵyzstandyq Ihtııar Nıshonovty (5:0) aıqyn utty. Qazaq boksshylarynyń ishinde álem chempıonatynan tórt márte júlde alǵan tek Serik Sápıev qana edi. Sol bıikke Abylaıhan da at baılap, fınalǵa shyqty. Endi reseılik Sergeı Koldenkovty eńserse, altyn medalǵa ıe bolady. Eresekter arasyndaǵy álem chempıonatyna alǵash qatysqan Sabyrjan Aqqalyqov (75 kg) jartylaı fınalda ózbekstandyq Fazlıddın Erkınbovpen judyryqtasýǵa tıis edi. О́zbekstandyq tarap aıqastan bas tartty. Endi jerlesimiz álem chempıony ataǵyn ıelený úshin Ismaıl Mýsolgovpen (Reseı) kúsh synasady.