Alaıaqtar turǵyndardy aldaýda jańa aıla qoldanyp jatyr. Azamattar ózderi baılanysqa shyǵyp, kıberqaýipke ushyraýy múmkin. Polısııa men Bas prokýratýra azamattarǵa saqtyq sharalaryn usynady jáne tek resmı baılanys nómirleri arqyly ǵana habarlasýdy eskertedi, dep habarlaıdy Egemen.kz.
Sońǵy ýaqytta ınternet-alaıaqtyqtyń jańa túri taralyp keledi.
«Qaskúnemder jetkizý qyzmetteri, basqarýshy kompanııalar jáne bankter atynan ártúrli habarlamalar men SMS-habarlamalar jiberip, azamattardy ózderi qaıta qońyraý shalýǵa ıtermeleıdi. Mundaı tásilder azamattardyń qyraǵylyǵyn tómendetip, qaýiptiń aldyn ala baıqalmaýyna ákeledi», delingen IIM taratqan habarlamada.
Alaıaqtar «avtorızasııadaǵy qate», «domofondy aýystyrý», «eseptegishterdi tekserý» sııaqty syltaýlarmen azamattardy óz erkimen baılanysqa shyǵýǵa májbúrleıdi. Saldarynan esh kúmándanbaǵan turǵyndar kıberalaıaqtarǵa áleýmettik ınjenerııa ádisterin qoldanýǵa múmkindik beredi. Mundaı jaǵdaılarda qaskúnemder senimge kirip, jeke derekterdi, bank málimetterin alýǵa nemese qarjylyq shyǵyn keltirýge baǵyttalǵan áreketter jasaıdy.
Aldyn alý maqsatynda polısııa mynadaı saqtyq sharalaryn usynady:
Beımálim hattarǵa, habarlamalar men qońyraýlarǵa synı kózqaraspen qaraý; Uıymdardyń tek resmı saıttarynda kórsetilgen baılanys nómirleri arqyly ǵana qońyraý shalý; eki faktorly aýtentıfıkasııany paıdalaný; Bank kartalarynyń derekterin, SMS arqyly keletin bir rettik kodtardy jáne ózge de qupııa aqparatty bógde tulǵalarǵa bermeý.Aıta keteıik, buǵan deıin Pavlodarda belgisiz adamdar ózderin energetıka ortalyǵynyń qyzmetkeri retinde tanystyryp, zeınetkerdiń shotynan 24 mln teńge ıemdenip almaqshy bolǵan edi.