Mańǵystaý oblysy – tıimdi geografııalyq ornalasýyna baılanysty kólik qozǵalysynyń barlyq túri damyǵan óńir. Jergilikti mańyzdaǵy avtomobıl joldarynyń 97 paıyzy jaqsy jaǵdaıda, bul – respýblıka boıynsha joǵary kórsetkish. 2025-2026 jyldary óńirde jalpy uzyndyǵy 491 shaqyrymdy quraıtyn 16 joba boıynsha qurylys jáne qaıta jańǵyrtý jumystary júrgizilip jatyr, dep jazady Egemen.kz.
Transkaspıı halyqaralyq kólik baǵyty arqyly júk tasymaly bıyl 20 paıyzǵa ósip, 2,5 mln tonnany qurady. Porttardyń tıimdi jumysyn qamtamasyz etý maqsatynda Quryq portynda teńiz túbin tereńdetý jumystary atqarylyp, aldaǵy kezeńde Aqtaý teńiz saýda porty akvatorııasynda jalǵasady.
Flotty damytý aıasynda 2027 jylǵa deıin kemeler sany 6-ǵa deıin ulǵaıtylyp, bıyl 7 myń tonnalyq «Nasipkali Marabayev» qurǵaq júk kemesi iske qosyldy. Sonymen qatar, Quryq pen Alıat porttary arasynda 2028 jylǵa deıin 6 parom kezeń-kezeńimen paıdalanýǵa beriledi.
Investorlardy tartý nátıjesinde 2026 jyly quny 300 mln AQSh dollaryn quraıtyn jańa teńiz portynyń qurylysy (1 kezeń) bastalady. Sondaı-aq, «Aqtaý – Qazaqstannyń batys qaqpasy» halyqaralyq saýda-logıstıkalyq habyn qurý josparlanǵan. Osy jobalardyń nátıjesinde 2030 jylǵa qaraı porttardyń ótkizý qabileti 60 mln tonnaǵa jetip, 2 700 jańa jumys orny ashylady.
Mańǵystaý oblysy