Bul týraly Memleket basshysy Astanany damytý jónindegi keńestegi sóılegen sózinde toqtaldy, dep habarlaıdy Egemen.kz Aqordanyń baspasóz qyzmetine silteme jasap.
Prezıdenttiń sózinshe, qoǵamda joǵary ekologııalyq mádenıet qalyptasyp, turǵyndar ortaq mekenimizdiń tynys-tirshiligine belsendi aralasa bastaǵany qýantady.
«Dál osy sebepti «Taza Qazaqstan» jobasyn bastadym. Ony búkil el qoldady. Qorshaǵan ortany qorǵaý – strategııalyq másele.
«Taza Qazaqstan» ıdeologııalyq kompanııasyna ne úshin bastamashy bolǵanymdy aıtaıyn. О́ıtkeni ekologııa, turmys-tirshiliktegi tazalyq bolmysymyzdyń bir bóligine aınalýǵa tıis.
Jalpy, Azııanyń birqatar qalasynda qaldyqtardy joıýdyń ekonomıkaǵa negizdelgen tásilderi qoldanylady. Shynynda da qoqyspen kúresý kerek», dedi Prezıdent.
Qasym-Jomart Toqaevtyń aıtýynsha, Tokıoda 14 mıllıon adam turady. Azǵantaı aýmaqta osynshama halyq ómir súrip jatsa da, ondaǵy tazalyq pen tártip óte joǵary deńgeıde.
«Mysaly, sammıtte sóılegen sózimde Japonııa Premer-mınıstrine «Elińizdiń qýaty – adamdaryńyzda. Sizder únemi úılesimdilikke úndeısizder. Japondar úırenýden jalyqpaıdy. О́zin qalaı ustaýdy biledi, ózge adamdarǵa qurmetpen qaraıdy. Úıin, páterin, ózi otyrǵan ǵımaratty taza ustaıdy. Sonymen qatar olar úzdiksiz bilim alady ári ony óskeleń urpaqqa da sińiredi» dep jyly sózimdi arnadym.
Bizge de dál osyndaı mentalıtet qajet. Sondyqtan sıfrlandyrý men jasandy ıntellektiden úlken úmit kútemin. Biz alǵa qaryshtap qadam basyp, tehnologııalyq ult bolýdyń úlgisine aınalýymyz kerek», dedi Prezıdent.
Prezıdent: Qaldyqtardy qaıta óńdeýdiń zamanaýı júıesin qalyptastyrýdy jedeldetý kerek
«Astana, Almaty jáne Shymkent qalalarynda osy tektes jobalardy iske qosý pysyqtalyp jatyr. Sonyń aıasynda táýligine myń jarym tonnaǵa deıin qaldyq óńdeý, elektr energııasyn óndirý qarastyrylǵan.
El boıynsha qaldyqtardy joıýdy kózdeıtin 40-tan astam joba josparlanǵan», dedi Prezıdent.
Memleket basshysynyń aıtýynsha, olardyń bári belgilengen merzimde ári sapaly júzege asyrylýǵa tıis.
«Sonymen qatar qaldyqtardy suryptaý jáne qoqys polıgondaryn damytý máselesine mán berý mańyzdy.
Bul isti keıinge qaldyrýdyń ekologııalyq saldary aýyr bolatynyn ári onyń turǵyndar turmysyna teris áser etetinin halyqaralyq tájirıbe kórsetip otyr. Sondyqtan Úkimet osy baǵytta qajetti sharalar qabyldaǵany durys», dedi Qasym-Jomart Toqaev.