M.Áýezov atyndaǵy Ońtústik Qazaqstan ýnıversıtetinde jasandy ıntellektti (JI) oqý úderisi men ǵylymǵa engizýge baǵyttalǵan jańa jobalar bastaý aldy. Osy jumystar aıasynda «Basqarylatyn sıfrlandyrý jáne ózgeristerge júıeli kózqaras» taqyrybynda eki kúndik strategııalyq sessııa ótýde, dep jazady Egemen.kz.
Is-sharaǵa ýnıversıtettiń basshylyq quramy, fakýltet jáne joǵary mektep dekandary, qurylymdyq bólim basshylary qatysyp, AI-first qaǵıdaty men sıfrlyq dáýirdegi ýnıversıtettiń róline qatysty biliktilikterin arttyrýda.
Spıker – Qazaqstandaǵy jasandy ıntellekt jáne sıfrlyq transformasııa salasynyń bilikti mamany, PhD, innoforce.kz kompanııasynyń ınnovasııa jónindegi dırektory Sanjar Áýbákirov.
Ýnıversıtet rektory Darhan Ahmed-Zakı is-sharada bul bastama Prezıdent Q.Toqaevtyń «Jasandy ıntellekt dáýirindegi Qazaqstan: ózekti máseleler jáne ony túbegeıli sıfrlyq ózgerister arqyly sheshý» atty Qazaqstan halqyna Joldaýyndaǵy tapsyrmasy aıasynda júzege asyrylyp jatqanyn atap ótti.
– Prezıdent óz Joldaýynda joǵary oqý oryndaryndaǵy oqý údersine JI engizý týraly birshama usynystaryn aıtyp, naqty tapsyrmalaryn berdi. Osy baǵytta ýnıversıtetimizde JI utymdy tustaryn qolǵa alýda AQSh, Qytaıǵa jumys sapary aıasynda jetekshi joǵary oqý oryndarynyń AI ýnıversıteti baǵytyndaǵy ozyq tájirıbelerimen tanystyq. Atap aıtqanda, joǵary oqý oryndary men Open AI, Anthropic, Google sekildi kompanııalary arasyndaǵy ózara is-qımyl tetikteri, Arizona State University (ASU), Northwestern, Peking, Fudan, Tsinghua ýnıversıtetteriniń ýnıversıtet jumysyn uıymdastyrýdyń ishki úderisterinde aldyńǵy qatarly AI-first jáne Human-centric tásilderdi qoldanýdaǵy jumystaryn óz kózimizben kórdik.
Endigi kezekte Áýezov ýnıversıtetin jasandy ıntellekt negizinde transformasııalaý boıynsha naqty qadamdar júzege asyrylady. Búgingi strategııalyq sessııa – osy baǵyttaǵy jumystyń alǵashqy bastamasy, – dedi Darhan Jumaqanuly.
Sessııanyń birinshi kúni spıker Sanjar Áýbákirov sıfrlandyrý, avtomattandyrý jáne transformasııa uǵymdarynyń aıyrmashylyǵyn túsindirip, basqarýshylyq sheshimderdegi ózekti máseleler men olardy sheshý joldaryn usyndy.
Sondaı-aq ekinshi kúni ýnıversıtettiń sıfrlyq dáýirdegi róline qatysty kózqarastardy anyqtap, saralap transformasııa negizderi, damý bastamalaryna qoıylatyn krıterııler jáne basshylyqtyń róli men tájirıbesi boıynsha mańyzdy máselelerdi talqylady. Sessııada qatysýshylar toptyq jumystar, ashyq pikirlesý arqyly sıfrlyq dáýirdegi ýnıversıtettiń róline qatysty kóptegen aqparatqa qol jetkizdi.
M.Áýezov atyndaǵy Ońtústik Qazaqstan ýnıversıtetinde jasandy ıntelekti keńinen engizý maqsatynda «Bilim berýdegi jasandy ıntellektti damytý qoǵamy» RQB de birlese birneshe jobalar qolǵa alyndy. Negizgi maqsat – Qazaqstan halqynyń jasandy ıntellektke qatysty saýattylyǵyn arttyrý jáne JI tehnologııalary arqyly bilim men ǵylymdy damytý.
Joba aıasynda oqý ordasyna jasandy ıntellekt júıelerin beıimdeý jáne engizý boıynsha qoldaý kórsetile otyryp, bilim alýshylar men oqytýshy-professorlar quramynyń biliktiligin arttyrý kózdelgen. Sondaı-aq bilim berýdi barlyq deńgeıde damytý, ony ǵylymmen yqpaldastyrý tetikteri qarastyrylady.