Jańa jyl qarsańynda Ulttyq ulannyń áskerı qyzmetshileri «Han Shatyr» saýda-oıyn-saýyq ortalyǵynda elorda turǵyndary men qonaqtaryna erekshe mýzykalyq syı jasady, dep habarlaıdy Egemen.kz.
Saýda ortalyǵy qonaqtary úshin kútpegen sátte áskerı kıimdegi ulandyqtar kópshilikke súıikti jańajyldyq áýenderdi oryndady. Merekelik performansqa IIM Ulttyq ulanynyń erler hory men Úlgili-kórsetimdi orkestri qatysyp, Jingle Bells jáne qazaq tilindegi Happy New Year sekildi tanymal kompozısııalardy shyrqady. Kórermender ónerpazdardy jyly yqylaspen qarsy aldy.
Mýzykalyq qoıylym nebári birneshe mınýtqa ǵana sozylǵanymen, bul ýaqyt adamdarǵa shynaıy emosııa men merekelik kóńil-kúı syılaýǵa jetkilikti boldy. Saýda ortalyǵynyń kelýshileri bir sátke aıaldap, bolǵan sátti telefonǵa túsirip, áskerı qyzmetshilerdiń ánderine qoshemet bildirdi.
Qalanyń qarbalas tirshiliginde bul tosyn konsert kúndelikti kúıbeńnen bir sátke alystatyp, Jańa jyldyń jaqyndaǵanyn sezinýge múmkindik berdi.
Áskerılerdiń aıtýynsha, olardyń basty maqsaty – adamdardy qýantyp, shynaıy ári jyly emosııalardan týyndaıtyn merekelik kóńil kúıdi birneshe mınýtqa bolsa da tartý etý.