Birikken Ulttar Uıymynyń Azııa jáne Tynyq muhıty úshin ekonomıkalyq jáne áleýmettik komıssııasy (ESKATO) óńir elderindegi tikeleı sheteldik ınvestısııalardy tartý dınamıkasyna arnalǵan Asia-Pacific Trade and Investment Trends 2025/2026 esebin jarııalady, dep jazady Egemen.kz.
Esepke sáıkes, Qazaqstan 2025 jyldyń qorytyndysy boıynsha Soltústik jáne Ortalyq Azııa óńirinde jańa (greenfield) jobalarǵa ınvestısııa tartý boıynsha eń iri alýshy bolyp, shamamen 19 mlrd AQSh dollaryn tartty. Bul ótken jylmen salystyrǵanda 266% artyq.
Soltústik jáne Ortalyq Azııadaǵy sýbóńirishilik ınvestısııalardyń shamamen 89%-y Qazaqstanǵa tıesili boldy, bul eldiń óńirdegi sózsiz kóshbasshylyǵyn qamtamasyz etti.
Soltústik jáne Ortalyq Azııa óńiri 2025 jyly jańa jobalarǵa ınvestısııa kóleminiń ósýi tirkelgen Azııa-Tynyq muhıty keńistigindegi jalǵyz sýbóńir bolǵany atalyp ótti, bul rette jahandyq ınvestısııalyq belsendilik jalpy tómendegen. Bul ósimniń negizgi draıveri dál Qazaqstan boldy.
Esepte Qazaqstan óńirdegi birqatar eń iri ınvestısııalyq jobalardy tartqany baıandaldy, onyń ishinde óńdeý ónerkásibi, jańa býyn metallýrgııasy, jańartylatyn energetıka jáne «jasyl» tehnologııalar salalaryndaǵy aýqymdy bastamalar bar.
Investorlardyń mynadaı baǵyttarǵa qyzyǵýshylyǵynyń ósip kele jatqany bólek kórsetildi:• jasyl energetıka jáne sýtek ekonomıkasy;• ónerkásiptik qaıta óńdeýdi damytý;• eksportqa jáne qosylǵan qunnyń halyqaralyq tizbekterine baǵdarlanǵan jobalar.
«Jahandyq ekonomıkalyq belgisizdik jaǵdaıynda ınvestorlar ınvestısııalyq sheshimder qabyldaýǵa barynsha salmaqty túrde qaraı bastady, naryqtardyń uzaq merzimdi turaqtylyǵyna, ınstıtýsıonaldyq ortanyń sapasyna jáne jobalardy súıemeldeýdegi memlekettik organdar men ınvestısııalyq agenttikterdiń róline erekshe mán berýde. Syrtqy syn-qaterlerge qaramastan, Qazaqstan iri halyqaralyq kompanııalardy tarta otyryp jáne uzaq merzimdi turaqty ósim úshin negiz qalyptastyra otyryp, Eýrazııanyń negizgi ınvestısııalyq habtarynyń biri retindegi pozısııasyn nyǵaıtýdy jalǵastyrýda», dep atap ótti ESKATO sarapshylary