Memleket basshysy Qasym-Jomart Toqaev medısınalyq qyzmetkerlerdi qorǵaýdy kúsheıtýge baǵyttalǵan zańǵa qol qoıdy, dep habarlaıdy Egemen.kz Aqordanyń baspasóz qyzmetine silteme jasap.
Zańǵa sáıkes, Qylmystyq kodekske «Medısınalyq qyzmetkerge nemese jedel medısınalyq járdem kóliginiń júrgizýshisine qatysty kúsh qoldaný ne qorqytý» týraly jańa 380-3-bap engizildi. Endi medısına qyzmetkerlerine jáne jedel járdem júrgizýshilerine qarsy jasalǵan áreketter úshin qylmystyq jaýapkershilik qarastyrylǵan.
Atap aıtqanda, kúsh qoldanamyn dep qorqytqandarǵa aıyppul, qoǵamdyq nemese túzetý jumystary, sondaı-aq eki jylǵa deıin bas bostandyǵyn shekteý ne aıyrý jazasy kózdelgen.
Al ómiri men densaýlyǵyna qaýipti emes kúsh qoldanǵany úshin jaza merzimi úsh jylǵa deıin, aýyrlatatyn jaǵdaılarda jeti jylǵa deıin ulǵaıady.
О́miri men densaýlyǵyna qaýipti zorlyq-zombylyq jasaǵandar bes jyldan on jylǵa deıin, al aýyrlatatyn mán-jaılar bolǵan jaǵdaıda 12 jylǵa deıin bas bostandyǵynan aıyrylýy múmkin.