Atyraýdaǵy mańyzdy ınvestısııalyq jobanyń biri – kókónis ónimderin saqtaıtyn iri logıstıkalyq ortalyq. Bul zamanaýı agrologıstıkalyq ınfraqurylymdy damytýǵa baǵyttalǵan mańyzdy joba retinde erekshelenip otyr.
Kókónis saqtaý qoımasynyń jalpy aýmaǵy 8 200 sharshy metrdi quraıdy. Munda 28 saqtaý kamerasy bar. Kameralardaǵy temperatýralyq rejim – 25 °C-tan +25 °C-qa deıin retteledi. Ortalyqta temperatýra men ylǵaldylyq avtomatty túrde baqylanady. «Ortalyqta eń ozyq úlgidegi tońazytqysh qondyrǵylary, jeldetý jáne mıkroklımatty basqarý júıeleri ornatyldy. Energııany únemdeıtin ınjenerlik sheshimder nysannyń úzdiksiz ári únemdi jumys isteýin qamtamasyz etedi», deıdi oblys ákiminiń orynbasary Marat Mýrzıev.
Ortalyq basshysy Baýyrjan Jolmuhanovtyń deregine qaraǵanda, logıstıkalyq ortalyq kúndelikti tutynýǵa qajetti azyq-túlik ónimderiniń baǵasyn tómendetýge baǵyttalyp otyr. Eki jyl buryn ortalyq qurylysyna 30 gektar jer telimi bólingen. Nysanda 5 temirjol tarmaǵy, konteınerlik alań men avtopark bar.
Al «A» sanatyndaǵy qoımalardyń aýmaǵy – 5 400 sharshy metr. Qoımalarda 15,5 myń tonna kókónis ónimderin saqtaýǵa bolady.
«Bul ortalyqtyń bir ereksheligi, Batys Qazaqstandaǵy biregeı banannyń pisip-jetilýin qamtamasyz etetin kamera iske qosyldy. Tutynýshylardan túsken suranysqa qaraı banandy kezeń-kezeńimen naryqqa shyǵarý múmkindigi bar», dedi B.Jolmuhanov.
Aýyl sharýashylyǵy salasynda 2025–2027 jyldary 12 ınvestısııalyq jobany iske asyrý kózdelgen. Bul jobalar arqyly 460 jańa jumys orny qurylady.
Jalpy, oblys byltyr jaqsy ósimmen jyldy aıaqtady. О́tken jylǵy qańtar-qazan aılarynda aýyl, orman jáne balyq sharýashylyǵy ónimderiniń ónimi 116,8 mlrd teńgeni qurady. Onyń ishinde ósimdik sharýashylyǵyndaǵy ónim kólemi 52,7 mlrd teńge bolsa, mal sharýashylyǵy 61,7 mlrd teńgege jetti.
Oblystyq aýyl sharýashylyǵy jáne jer qatynastary basqarmasynyń basshysy Amangeldi Salamattyń deregine qaraǵanda, munaıly óńirde mal sany da kóbeıip otyr. Qazir 238 myń múıizdi iri qara, 590 myń qoı-eshki, 150 myńǵa jýyq jylqy, 43 myń túıe tirkelipti. Munyń syrtynda 243,8 myń qus bar. Atalǵan kezeńde 40 myń tonna et, 27,6 myń tonna sút, 43 mln dana jumyrtqa alyndy.
Byltyr egistik alqaptan 144,3 myń tonna ónim jınalǵan. Onyń ishinde 68,7 myń tonna kókónis, 39,6 myń tonna baqsha ónimi, 7,3 myń tonna kartop, 28,6 myń tonna mal azyqtyq daqyl bar. Máselen, Mahambet aýdanynda egistik alqaptyń kólemi eki esege artqany baıqalyp otyr. Bul aýdandaǵy 71 sharýashylyq pen jeke sektordaǵy 5 myń gektar alqapqa aýyl sharýashylyǵy daqyldary egildi.
Atyraý oblysy