Qazaqstan kúres federasııasynyń prezıdenti Erkin Oqasov Shveısarııada Birikken kúres álemi uıymynyń (UWW) basshysy Nenad Lalovıchpen kezdesti. Josparly kezdesýde kúresti damytý, halyqaralyq seriktestikti nyǵaıtý jaıy talqylandy.
Keleli kezdesýde UWW kúntizbesindegi jarystar qataryna elimizdegi týrnırlerdiń birin qosý, buqaralyq sportty órkendetýdiń mańyzdy qadamdary talqylandy. Federasııa basshysy E.Oqasov aldaǵy ýaqytta tek sporttyq nátıjege emes, elimizdi kúrestiń aımaqtyq damýyna serpin beretin, halyqaralyq is-sharalardy qabyldaı alatyn turaqty ortalyqqa aınaldyrýǵa kúsh salatynyn jetkizdi. Osy baǵyttaǵy birqatar bastamany atap ótti. Sonyń ishinde UWW-diń resmı kúntizbesine qazaq jerindegi halyqaralyq jarystyń birin engizý máselesi qozǵaldy. Federasııa prezıdenti elimizdegi týrnırlerdiń birine reıtıngtik mártebe berý arqyly elimizge álemniń úzdik balýandaryn tartýǵa, báseke deńgeıin ósirýge ári jarystardyń halyqaralyq tartymdylyǵyn arttyrýǵa bolatynyn atap ótti. Budan keıin sporttyq yntymaqtastyqty ǵylym baǵytynda kúsheıtý jaıy da sóz boldy. Birikken kúres álemi uıymynyń basshysy Nenad Lalovıch Astana qalasynda Kúres akademııasynyń irgetasyn qalaý, sondaı-aq ony Orta Azııadaǵy halyqaralyq oqý-jattyǵý habyna aınaldyrý jobasyn qoldaıtynyn bildirdi.
Memleket basshysy Qasym-Jomart Toqaev 2024 jylǵy Parıj Olımpıadasynyń júldegerlerimen kezdesýinde halyqaralyq sport uıymdarymen áriptestikti kúsheıtýdi, sportshylarymyzdyń básekege qabilettiligin arttyryp, álemdik jarystardy ózimizde ótkizýge kúsh salýdy tapsyrǵan bolatyn. Osy tapsyrmany iske asyrý maqsatynda elimizge bedeldi halyqaralyq uıymdardyń basshylary at basyn buryp, túrli kelissózder júrgizildi. Mártebeli meımandardyń qatarynda Nenad Lalovıch te boldy. Birikken kúres álemi uıymynyń prezıdenti Astanadaǵy sport nysandaryn aralap, ınfraqurylymmen tanysty. Jahandyq dodalardy ótkizýge qanshalyqty áleýetimiz jetetinin baǵamdady.
Erkin Qadyrǵalıuly kúres federasııasynyń prezıdenti laýazymyna byltyr jeltoqsan aıynda taǵaıyndaldy. Zor jaýapkershilik júktelgen mansaptyń salmaǵy aýyr. Balýandyq óner babamyzdan qanymyzǵa taraǵan dep kúpingenimizben, grek-rım, erkin, áıelder kúresinen táýelsizdigimizdi alǵan 35 jyldyń ishinde Olımpıada chempıony shyqqan joq. Jaqsylyq Úshkempirov pen Shámil Serikovtiń 46 jyl buryn Máskeý jazǵy Olımpıadasynan oljalaǵan altyn medalin áli medet tutyp kelemiz. Sondyqtan arqalar júk áli de zilmaýyr.
Sport túrleriniń qanshalyqty órkendegenine ólshem bolar alań – álem chempıonaty men Olımpııa oıyndary. О́kinishtisi, bizdiń eldiń balýandaryna tórt jylda aınalyp keletin Olımpıadanyń altyny asý bermes asqarǵa aınalyp tur. Federasııa tizginin ustaǵan jańa basshylyq osy olqylyqty bútindeı alsa – úmittiń aqtalǵany. Halyqtyń kúteri de, jankúıerdiń talaby da osy.