Dıagnostıka men emdeýdiń ozyq tehnologııalaryn engizý sheteldik klınıkalarǵa jiberiletin balalar sanyn eki ese azaıtýǵa múmkindik beredi. Bul týraly Úkimet otyrysynda densaýlyq saqtaý mınıstri Aqmaral Álnazarova baıandady, dep habarlaıdy Egemen.kz.
Onyń aıtýynsha sońǵy úsh jylda shetelge týys emes donordan baǵanaly jasýshalardy transplantasııalaýǵa balalardy jiberý 3 esege, al kardıohırýrgııalyq emge joldaý 5,2 esege qysqardy. Jyl saıyn 2 myńnan astam balaǵa kardıohırýrgııalyq operasııalar jasalyp, júrek aqaýlary der kezinde túzetilip jatyr. Bıyl protondyq, ıodterapııa jáne tamyrly aqaýlardy emdeý tolyq qoljetimdi bolady.
«Biz mı isikteri men tamyrly patologııalardy bir satyly emdeý úshin gıbrıdti operasııalyq bólmelerdi engizip jatyrmyz. Qyzmetti jańǵyrtý aıasynda 36 balaǵa «gamma-pyshaq» apparatynda radıohırýrgııalyq operasııalar júrgizildi. Jyl saıyn 400 balaǵa estý ımplanttary ornatý boıynsha operasııalar jasalady, orta eseppen 700 shala týǵan nárestege retınopatııany túzetý júrgiziledi. Josparlanǵan is-sharalardyń barlyq kesheni azamattardyń shetelge emdelýge jiberilýin 50%-ǵa tómendetýge múmkindik beredi», dedi mınıstr.
«Qazaqstan balalary»: Tujyrymdama balalarǵa qatysty qandaı máselelerdi sheshedi?
Sondaı-aq mınıstr mektepterdegi medısınalyq pýnktterdi defıbrıllıatorlarmen jabdyqtaý jáne stomatologııalyq kabınetterin ashý máselelerine toqtaldy.
«Mektepterdiń medısına qyzmetkerleri jazataıym oqıǵalar kezinde ǵana emes, shuǵyl jaǵdaıda da kómek kórsetýge daıyn bolýy tıis. Sondyqtan mektepterdi defıbrıllıatorlarmen qamtamasyz etý óte mańyzdy. Osy oraıda, ákimderden jaraqtandyrýǵa tıisti qarjylandyrý qarastyrýyn suraımyn. Aldaǵy 3 jyl ishinde qosymsha 862 stomatologııalyq kabınet ashýdy josparlap otyrmyz», dedi Aqmaral Álnazarova.
Mınıstr sondaı-aq elimizde náreste ólimi eki jylda 13%-ǵa tómendegenin atap ótti.