Bıylǵy jyldyń basty sporttyq dodasy 6–22 aqpan aralyǵynda Mılan jáne Kortına-d’Ampesso qalalarynda ótedi. Qysqy Olımpııa oıyndaryn «Qazaqstan» jáne «Qazsport» telearnalary tikeleı efırde kórsetedi.
«Qazmedıa» ortalyǵynda qysqy Olımpııa oıyndarynyń teletranslıasııasyna arnalǵan resmı tanystyrylym ótti. Is-sharaǵa Mádenıet jáne aqparat mınıstrligi men Týrızm jáne sport mınıstrliginiń ókilderi, tanymal sportshylar men sala ardagerleri, sport jýrnalısteri, sondaı-aq oıyndardy júrgizetin kommentatorlar qatysty.
Qysqy Olımpııa oıyndarynyń júldegeri, Qazaq sportynyń tarıhynda qysqy Olımpıada da altyn medal ıelengen tuńǵysh sportshy Vladımır Smırnov baılanysqa shyǵyp, ulttyq qurama múshelerine sáttilik tilep, olarǵa zor senim artatynyn jetkizdi. Elordadaǵy qysqy sport túrlerine mamandanǵan sport keshenderinen tikeleı qosylymdar uıymdastyrylyp, short-trek, mánerlep syrǵanaý men bıatlon sport túrlerinen dodaǵa túsetin sportshylar da pikirin bildirip, suhbattar júrgizildi. Is-shara sońynda Olımpıada dodasyna qatysatyn sportshylar tikeleı efırge qosylyp, óz pikirleri men daıyndyq barysy týraly aıtty.
Baıraqty básekeniń teletranslıasııasy resmı ashylý saltanatynan eki kún buryn bastalady. Alǵashqy bolyp hokkeıden áıelder quramalary men kerlıng sportshylary jarys jolyna shyǵady. Italııadaǵy dodada 10 sport túrinen 36 sportshymyz el senimin arqalaıdy.
Qysqy Olımpııa oıyndarynyń ashylý saltanaty 6 aqpan kúni saǵat 00:00-de «Qazaqstan» jáne «Qazsport» telearnalary arqyly tikeleı efırde kórsetiledi. Eki telearnanyń efırinde Olımpııa oıyndaryn 22 kommentator júrgizedi. Olardyń qatarynda Eseı Jeńisuly, Sergeı Raılıan, Rýslan Baqytjan, Ersin Erikuly, Azat Smaǵulov, Lılıana Áljanova syndy kommentatorlar bar. Sondaı-aq «Qazaqstan» jáne «Qazsport» telearnalarynan kún saıyn «Olımpıada oıyndarynyń sholýy» baǵdarlamasy, al «Qazsport» arnasynan tikeleı efırde «Mılan–Kortına-2026» stýdııalyq baǵdarlamasy kórermenge jol tartady.