Qonaev qalasynyń Mádenıet úıinde jańa Konstıtýsııa jobasy men 15 naýryzǵa josparlanǵan respýblıkalyq referendýmǵa arnalǵan «Ádiletti jáne Progressıvti Qazaqstannyń Halyqtyq Konstıtýsııasy úshin!» jalpyulttyq koalısııasy músheleriniń kezdesýi ótti. Is-sharaǵa Premer-mınıstrdiń orynbasary – Mádenıet jáne aqparat mınıstri Aıda Balaeva tóraǵalyq etti, dep jazady Egemen.kz.
Jıynǵa Májilis depýtattary Maqsat Tolyqbaı, Janarbek Áshimjanov, Sergeı Ponomarev jáne qoǵamdyq ınstıtýttar, áleýmettik qoldaý salasynyń ókilderi, bilim berý salasynyń mamandary, jastar uıymdary men óńir belsendileri qatysty.
Qoǵamdyq keńes músheleri jańa Konstıtýsııa jobasyn talqylaıdy
Otyrys barysynda Aıda Balaeva usynylǵan jańa Konstıtýsııa jobasynyń basty ózegi – azamattardyń múddesin qorǵaý jáne eldiń uzaqmerzimdi turaqty damýy ekenin atap ótti. Qujatta memlekettiń baǵyty, qoǵamnyń qandaı qundylyqtarǵa súıenip damıtyny jáne bılik pen halyq arasyndaǵy qatynastyń jańa deńgeıi aıqyn kórinis tapqan.
«Eń aldymen, Jańa Konstıtýsııanyń Preambýlasyna toqtalǵym keledi. Onda adam quqyqtary men bostandyqtary alǵash ret memlekettiń eń joǵary basymdyǵy retinde aıqyn belgilenip otyr. Bul – memlekettik saıasattyń fılosofııasyn túbegeıli ózgertetin qaǵıdat. Iаǵnı memleket endi azamat úshin, azamattyń qadir-qasıeti úshin qyzmet etýi tıis degen ustanym zańnyń ózegine aınalyp otyr. Sonymen qatar birlik pen yntymaqtastyq, ultaralyq jáne dinaralyq kelisim Qazaqstan memlekettiliginiń berik irgetasy retinde bekitilgen. Almaty oblysy sekildi kópetnosty, kópkonfessııaly óńir úshin bul normalardyń mańyzy aıryqsha», dedi ol.
Astanada jańa Konstıtýsııa jobasy boıynsha saraptamalyq talqylaý ótti
Jobany daıyndaý barysy men negizgi ınstıtýsıonaldyq ózgerister týraly tolyq aqparatty Májilis depýtaty Sergeı Ponomarev baıandady. Onyń aıtýynsha, jumys kezeń-kezeńimen jáne ashyq formatta júrgizildi, al usynylǵan túzetýler júıeniń tıimdiligi men saıası jaýapkershilikti arttyrýǵa baǵyttalady.
«Ýaqyt ózgerip jatyr, sondyqtan jańa Konstıtýsııa da qajet boldy. Jumys ótken jyldyń qyrkúıeginde bastalyp ketti. Bul prosess «asyǵys ári jabyq túrde ótti» deý shyndyqqa janaspaıdy. Qarashadan bastap parlamenttik komıssııa jumys istedi, keıin konstıtýsııalyq reforma jónindegi komıssııanyń 12 otyrysy ótti. Jalpy 130 adam – belgili zańger-ǵalymdar, depýtattar, fraksııa jetekshileri men sarapshylar qatysty. Barlyǵy ashyq túrde ótti», dedi depýtat.
«Halyqtyq Konstıtýsııa – qýatty memleket» taqyrybynda sarapshylar kezdesýi ótti
Ata zańdy jańartýda adamı kapıtal men jastar saıasatynyń mańyzyn Májilis depýtaty Maqsat Tolyqbaı aıqyndap berdi. Ol Konstıtýsııa azamattardyń ómir sapasyna tikeleı áser etetinin jáne zaman talabyna saı bolýy tıis ekenin aıtty.
«Konstıtýsııa – árqaısymyzdyń ómirimizge tikeleı yqpal etetin basty qujat. Mańyzdy máselelerdi halyq referendým arqyly sheshýi qajet. 1995 jylǵy Konstıtýsııadaǵy keıbir normalar búgingi talaptarǵa saı emes. Bilim, ǵylym jáne ınnovasııalar Preambýlada negizgi qundylyq retinde belgilenýi beker emes. Bizge jastardyń ıntellektýaldyq áleýetin ashý mańyzdy», dedi Maqsat Tolyqbaı.
Kezdesý barysynda Májilis depýtaty Janarbek Áshimjanov sóz sóılep, jobany muqııat zerdeleý qajettigin atap ótti. «Qazaqstandyq qoǵamdyq damý ınstıtýty» KEAQ basqarma tóraǵasy Juldyzaı Ysqaqova jańa qujattaǵy otbasy qundylyqtaryna toqtaldy. «Qazaqstan halqyna» QQ tóraǵasy Lázzat Shyńǵysbaeva qujattyń áleýmettik baǵytyn sóz etti. Abaı atyndaǵy QazUPÝ rektory Bolat Tilepov bilim men ǵylymnyń róline erekshe nazar aýdardy.
Kezdesý sońynda qatysýshylar respýblıkalyq referendýmǵa belsendi qatysý – eldi jańǵyrtý men ıntellektýaldyq áleýetti nyǵaıtýdyń mańyzdy qadamy ekenin atap ótti.