Elordadaǵy Ulttyq akademııalyq kitaphanada belgili jazýshy-pýblısıst, Qazaqstannyń eńbek sińirgen qaıratkeri Sharhan Qazyǵuldyń 70 jas mereıtoıyna oraı jaryq kórgen «Tańdamaly» jınaǵynyń tusaýkeseri ótti.
«Álem áınegindegi ásemdik», «Dúbára dúnıe», «Toǵyz taraý týyndy», «Ońashadaǵy onlaın oılar», «Palıtrasyz portretter», «Fýtbol fılosofııasynyń fragmentteri», «Shalahmetov sheńberi», «Segizinshi nota» jáne taǵy basqa pýblısıstıkalyq kitaptarymen, sondaı-aq «Mesenat» ádebı baıqaýynyń jeńimpazy atanǵan «Kúlpet» atty romanymen oqyrmanǵa jaqsy tanys Sharhan Qazyǵuldyń 70 jasqa tolý mereıto ıyna oraı ótkizilgen is-sharada alǵashqy sóz alǵan Prezıdent keńesshisi, Ulttyq Ǵylym akademııasynyń akademıgi Baýyrjan Omarov mereıtoı ıesine Memleket basshysynyń quttyqtaýyn jetkizdi. Sondaı-aq qalamgerge Májilis tóraǵasy Erlan Qoshanovtyń, Memlekettik keńesshi Erlan Qarınniń, Premer-mınıstr orynbasary – Mádenıet jáne aqparat mınıstri Aıda Balaevanyń quttyqtaý hattary tabystaldy.
Sharhan Qazyǵuldyń jeti bólimnen turatyn «Tańdamalysyna» ár jyldary jazǵan kórkem shyǵarmalary men non-fıkshn janrynda jazylǵan pýblısıstıkalyq dúnıeleri toptastyrylǵan. Atap aıtqanda, «Mesenat» ádebı syılyǵyna laıyq bolǵan «Kúlpet» romany men eki áńgimesi, kezinde oqyrmandardan joǵary baǵasyn alǵan «Ońashadaǵy onlaın oılar» týyndysy, ádebıet, óner jáne jýrnalıstıka salasyndaǵy tanymal tulǵalar týraly esseleri jınaqtalǵan. Tulǵalar obrazyn ashýda ózindik stıli qalyptasqan avtordyń jatyq tili men jazý sheberligi kitaptyń mazmuny men qurylymyn asha túsken. Sonymen qatar tańdamaly jınaqtan oryn alǵan móltek portretter men «Fýtbol fılosofııasynyń fragmentteri» týyndysy da oqyrman qyzyǵýshylyǵyn týdyratyny anyq.
Is-shara barysynda avtor men onyń shyǵarmashylyǵy týraly zııaly qaýym ókilderi, depýtattar men qoǵam qaıratkerleri óz oılaryn ortaǵa saldy.