Astana qalasyndaǵy №117 saılaý ýchaskesine Qyrǵyz Respýblıkasynyń Saılaý jáne referendým ótkizý jónindegi ortalyq komıssııasynyń tóraǵasy Tynchtyk Shaınazarov kelip, konstıtýsııalyq referendýmnyń ótý barysymen tanysty, dep habarlaıdy Egemen.kz.
Sarapshynyń aıtýynsha, kez kelgen elde bıliktiń negizgi kózi – halyq. Al halyq óz bıligin saılaý men referendým arqyly júzege asyrady. Mundaı saıası naýqandarda azamattar óz eliniń bolashaqtaǵy damý baǵytyn qalaı kóretinin bildiredi.
Tynchtyk Shaınazarov Qazaqstanda ótip jatqan referendýmnyń mańyzdylyǵyna toqtalyp, bul bastama eldiń aldaǵy damýyna áser etetin mańyzdy qadam ekenin aıtty. Onyń sózinshe, byltyrǵy jyldyń qyrkúıeginde Qazaqstan Prezıdenti Qasym-Jomart Toqaev halyqqa Joldaý jasap, konstıtýsııalyq ózgerister máselesin kóterdi. Búginde sol bastamanyń jalǵasy retinde referendým ótip jatyr.
Referendýmda daýys bergender sany 64,43 paıyzǵa jetti
Sarapshy saılaý ýchaskesindegi jaǵdaıdy oń baǵalady. Aıtýynsha, daýys berýge kelgen azamattardyń belsendiligi jaqsy, adamdardyń kóńil kúıi kóterińki.
«Ýchaske mańynda biraz ýaqyt baqylap turdym. Qazirdiń ózinde kelýshilerdiń qarasy jaqsy. Naqty qansha paıyz ekenin aıtý qıyn, biraq halyqtyń belsendiligi baıqalady. Eń bastysy – adamdardyń kóńil kúıi jaqsy, merekelik atmosfera seziledi. Keshke deıin kútip, qorytyndy nátıjelerge qaraı tıisti baǵasyn berýge bolady», dedi ol.
Aıta keteıik, Qyrǵyzstannan referendýmdy baqylaý úshin arnaıy delegasııa kelgen. Tynchtyk Shaınazarovtyń aıtýynsha, Qazaqstanǵa barlyǵy 18 baıqaýshy jiberilgen. Onyń altaýy Astanaǵa kelse, qalǵan 12-si Qyrǵyzstanmen shektesetin Qazaqstan óńirlerindegi ýchaskelerde baqylaý júrgizip jatyr.
Vashıngton, Nıý-Iork, Ottava qalalarynda referendým ýchaskeleri ashyldy
Sonymen qatar ol saılaý ýchaskesiniń tehnıkalyq jáne uıymdastyrýshylyq deńgeıine de toqtaldy.
«Ár memlekettiń óz tásili bar. Tehnıkalyq jabdyqtalý ártúrli bolýy múmkin. Biraq eń mańyzdysy – azamattardyń erkin daýys berýine múmkindik berý. Búgin bul jerde qupııa daýys berý tolyq qamtamasyz etilgenin kórdik. Adamdardyń shoǵyrlanýy, retsizdik joq, bári jaqsy uıymdastyrylǵan», dedi.
Sarapshynyń aıtýynsha, bul onyń Astanaǵa alǵash ret kelýi. Ol Qazaqstanǵa sapary barysynda referendýmnyń ótý barysyn baqylap, tájirıbe almasýǵa múmkindik týǵanyn atap ótti.