Almatyda ótken referendým barysynda aıtarlyqtaı zańbuzýshylyqtar tirkelmegen. Daýys berý úderisiniń uıymdastyrylý deńgeıi burynǵy naýqandarmen salystyrǵanda edáýir jaqsarǵan. Bul týraly jazýshy, ekonomıst jáne qoǵam qaıratkeri Beknur Qısyqov aıtty. Ol referendým kezinde táýelsiz baqylaýshylardy oqytyp, Almatydaǵy birneshe ýchaskede daýys berý barysyn ózi de baqylaǵan, dep habarlaıdy Egemen.kz.
Onyń aıtýynsha, referendýmdy baqylaý jumystaryna Qazaqstan boıynsha «Halyq úni» qoǵamdyq birlestigi aıasynda daıyndyqtan ótken eriktiler tartylǵan.
«Búkil Qazaqstan boıynsha bizdiń koalısııa men bastamamyz sheńberinde shamamen eki myńǵa jýyq adam baıqaýshy retinde jumys istedi. Bul adamdar materıaldyq syıaqy úshin emes, óz erkimen kelgen jastar boldy. Olar el ómirindegi mańyzdy saıası oqıǵaǵa qatysyp, óz úlesin qosqysy keldi. Biz olar úshin arnaıy trenıngter uıymdastyryp, baıqaýshylardyń quqyqtary men mindetterin, baqylaý erejeleri men quqyqtyq normalardy túsindirdik. Sonyń nátıjesinde olar joǵary deńgeıdegi daıyndyq pen kásibı jaýapkershilik kórsetti», dedi Beknur Qısyqov.
Referendýmdy baqylaý: «El daýysy» qory aldyn ala qorytyndylaryn jarııalady
Ol sondaı-aq referendým kezinde óńirlerdegi saılaýshylardyń belsendiligi ártúrli bolǵanyn atap ótti. Keıbir oblystarda daýys berýge qatysý deńgeıi 87-90 paıyzǵa deıin jetse, Almatyda bul kórsetkish shamamen 33 paıyzdy quraǵan.
«Alǵash qaraǵanda 33 paıyz az kórinýi múmkin. Alaıda Almatynyń úlken megapolıs ekenin eskerý kerek. Munda turǵyndar mobıldi, jumys kestesi tyǵyz, sondaı-aq saıası prosesterge degen kózqaras ta ózgeshe bolýy múmkin. Sondyqtan qala úshin bul kórsetkishti de belgili bir deńgeıde mańyzdy dep baǵalaýǵa bolady», dep túsindirdi ol.
Beknur Qısyqovtyń aıtýynsha, baqylaýshylar keıbir daýly jaǵdaılardy da tirkegen. Negizinen olar ýchaskelerdegi onlaın-translıasııalar, bıýlletenderdi sýretke túsirý nemese daýys berý kúni áleýmettik jelilerde úgit sıpatyndaǵy jazbalar jarııalaý sııaqty máselelerge qatysty bolǵan.
«Qazirgi kezde blogerler men áleýmettik jeli belsendileri keıde tikeleı ýchaskeniń ózinde óz pozısııasyn bildirýge tyrysady. Keıbir azamattar daýys bergen bıýlletendi sýretke túsirip, ony ınternette jarııalaǵan jaǵdaılar boldy. Al zań boıynsha mundaı áreketke tyıym salynǵan. Sonymen qatar onlaın-translıasııa máselesine qatysty da pikirtalastar boldy. Zańnamada bul naqty kórsetilmegenimen, mundaı áreketter daýys berý qupııasyna nuqsan keltirýi múmkin degen túsinik bar. Sondyqtan osy máseleler tóńireginde keıbir kelispeýshilikter týyndady», dedi ol.
TMD baqylaýshylary: Referendýmda daýys berý prosesi ashyq ári ádil ótti
Sonymen qatar Beknur Qısyqov Almatyda baqylaýshylar tarapynan óreskel zańbuzýshylyqtar anyqtalmaǵanyn aıtty. Onyń pikirinshe, saılaý prosesin uıymdastyrý jyldan jylǵa jetildirilip keledi.
«Aldyńǵy naýqandarmen salystyrǵanda uıymdastyrý deńgeıi aıtarlyqtaı óskenin baıqadyq. Ýchaskelerde aqparattyq stendter, qajetti baılanys derekteri, daýys berý shemalary, jáshikterdiń ornalasýy – barlyǵy standart talaptaryna sáıkes ornalastyrylǵan. Tipti materıaldardyń geometrııalyq ornalasýy men vızýaldy bezendirilýine deıin kásibı deńgeıde daıyndalǵan. Jalpy alǵanda, daýys berý tynysh ári qalypty jaǵdaıda ótti», dep túıindedi ol.