Asa qamqor, erekshe meıirimdi Allanyń atymen bastaımyn! Barlyq maqtaý Allaǵa tán! Ardaqty Paıǵambarymyz Muhammedke Allanyń salaýaty men sálemi bolsyn!
Ardaqty aǵaıyn!
Sizderdi kúlli musylman balasynyń ulyq merekesi Oraza aıtpen shyn júrekten quttyqtaımyn! Aıt qabyl bolsyn! Barshańyzǵa myqty densaýlyq, otbasylaryńyzǵa amandyq, jumystaryńyzǵa bereke tileımin. Alla Taǵala bárimizdiń mereıimizdi ústem etsin!
Oraza aıt – syı men sııapatqa, qurmet pen nyǵmetke, sheksiz saýapqa bólenetin sát. Bul týraly ardaqty Paıǵambarymyz Muhammed (oǵan Allanyń salaýaty men sálemi bolsyn): «Oraza aıt kúni perishteler jer betine túsedi de, ár joldyń basynda turyp: «Ýa, musylman qaýymy, Rabbylaryńa asyǵyńdar! Sender túndi namazben, kúndizdi orazamen ótkizýge buıyrylǵanda amal etip, Rabbylaryńa boısunǵandaryń úshin Alla senderdi úlken saýap pen tolassyz nyǵmetke bóleıdi. Sol úshin ózderińe tartý etilgen syılyqtaryńdy alyńdar», dep daýystaıdy. Al Oraza aıt namazyn oqyp bolǵannan keıin bir perishte adamdarǵa bylaı deıdi: «Shúbásiz Jaratqan Rabbylaryń kúnálaryńdy keshti. Úılerińe Allanyń jolynan adaspaǵan kúıde oralyńdar! Rasynda, bul kún jer men aspan áleminde syı-sııapatqa kenelý kúni dep atalady», degen.
«Aıt» sózi «merekeleý», «hal surasý», «bir-birin qýantý», «qýanyshqa toptalý» degen maǵynany bildiredi. Islamdaǵy ulyq meıramdar musylman qaýymynyń, barsha adamzattyń júregine qýanysh syılaýǵa úndeıdi. Aıt kúni otbasyn, aǵaıyn-týysty, kómekke muqtaj adamdardy, qarttar men qaraýsyz qalǵan balalardy, múmkindigi shekteýli jandardy qýantýdyń saýaby mol. Paıǵambarymyz (oǵan Allanyń salaýaty men sálemi bolsyn) aıtqandaı, paryz amalynan keıingi eń abzal amal – musylmannyń júregine qýanysh uıalatý. Adam balasy ózgeni qýantý arqyly ózi de qýanyshqa bólenedi.
Alla Taǵala: «Men paryz etken orazany pendelerim ótep, aqysyn alýǵa (Aıt namazyn óteýge) meshitke bet aldy. Olar Men úshin oraza ustady, Meniń pármenimmen aýyz ashty, endi qýanyshqa kenelsin...», deıdi. Jaratýshy Jabbar Iemiz barshamyzdy eki dúnıe qýanyshy men nyǵmetine bólegeı.
Qurmetti baýyrlar!
Oraza aıt – adamdar arasyndaǵy baýyrmaldyqty arttyryp, tatýlyq pen syılastyqty nyǵaıtatyn ulyq mereke. Osy aıt kúnderi bir-birimizge izgi tilekter aıtyp, aǵaıyn-týys, kórshi-qolańmen aralasyp, úlkenge qurmet, kishige izet kórsetip, qoǵamymyzdaǵy birlik pen berekeni arttyra túsýimiz kerek.
Oraza aıt merekesi qutty bolsyn! Ár shańyraqqa baq pen bereke, birlik pen tatýlyq tileımin. Alla Taǵala siz ben bizdi kelesi Ramazanǵa deıin aman-esen jetkizip, mol saýapqa kenelýdi násip etkeı. Elimiz aman, jurtymyz tynysh, táýelsizdigimiz baıandy bolǵaı! Áýmın!
Naýryzbaı qajy TAǴANULY,
QMDB tóraǵasy, Bas múftı