Elordany eńselendirgen ekonomıkalyq aımaq damýdyń jaýapty kezeńine qadam basty

Jalpy mundaı aımaqtardyń jumys isteý merzimi 25 jyl dep belgilengen. Sondyqtan bıylǵy jeltoqsan aıynda elordalyq aımaqtyń arnaıy mártebesi joıylyp, ol kádimgi tolyqqandy ındýstrııalyq aımaq retinde jumysyn jalǵastyrady.

Shahar ekonomıkasyn ártarap­tandyrý, zamanaýı óndiris oshaqtaryn qurý – bas qalanyń strategııalyq damý baǵytynyń ózegi. Búginde Astana iri ónerkásiptik, logıstıkalyq ortalyqqa aınalyp keledi. Osy oraıda shahardaǵy arnaıy ekonomıkalyq aımaqtardyń róli erekshe.

Bul baǵytta atqarylyp jatqan aýqym­dy jumystar, qolǵa alynǵan sony jobalar jaıynda «Astana Invest» qalalyq ınvestısııalyq damytý ortalyǵy tóra­ǵasynyń orynbasary Sábıt Muham­medjanuly mańyzdy derekterdi alǵa tartty. Onyń málimdeýinshe, qazirgi ýaqytta bas qala aýmaǵynda eki arnaıy ekonomıkalyq aımaq jumys isteıdi: «Astana – jańa qala» men «Astana-Tehnopolıs».

«Astana – jańa qala» – eldegi eń alǵashqy arnaıy ekonomıkalyq aımaq. Onyń basty maqsat-mindeti – elordanyń sol jaǵalaýyn jedel qarqynmen damytý. Aýmaǵy 15 myń gektardan asady. Jalpy, sol jaǵalaý to­lyqtaı ındýstrııalyq aımaq retinde bel­gi­lengen. Qurylysty, nysandardy tezdetý maqsatynda №1 Indýstrııalyq park qu­ryldy. Oń jaǵalaýda ornalasqan bul park­tiń kólemi 598 gektardy quraıdy. Qa­zirgi ýaqytta ınfraqurylymnyń aıaqta­lý deń­geıi 87%-dy quraıdy, ony damytýǵa jum­salǵan shyǵyndar 24,8 mlrd teńgege jetti.

Búginde №1 Indýstrııalyq park aýmaǵynda 130-dan astam ónerkásip orny shoǵyrlanǵan. Onda lokomotıv, elektrovoz qurastyrý zaýyttary, «Shtadler» vagon qurastyrý kásiporny, «Taý-Ken Altyn» altyn óńdeý zaýyty sekildi alyp óndiris oshaqtary turaqty jumys istep tur. Oǵan qosa, «BI Group» kompanııasynyń modýldi úıler qurastyratyn «Modex» zaýyty, «Shar qurylys» kompanııasynyń «GLB» kásiporny, «Sensata» qurylys tobynyń «Uniton» zaýyty bar. Elorda naryǵyndaǵy suranysty qamtamasyz etýde bul kásiporyndardyń mańyzy zor.

О́ndiriletin ónimderdiń naryqtaǵy úlesi de aýqymdy. Osy rette Sábıt Muham­medjanuly shyǵarylatyn taýarlardyń geografııalyq baǵytyna toqtaldy.

«Indýstrııalyq parktegi 130-dan astam kásiporynnyń 12-si tikeleı eksport­qa baǵyttalǵan. Olar shetel naryǵyna elektrovozdar, lokomotıvter, tranzıstrler, munaı salasyna qajetti ónimder, átir­ler men toqyma buıymdaryn shyǵara­dy. Qalǵan kásiporyndardyń ónimderi negizi­nen Astana qalasy men onyń irgesindegi eldi mekenderdiń suranysyn óteıdi. Kir­pish, qurǵaq qurylys qospalary sekildi materıaldar bas qalanyń qurylysyna ba­ǵyttalǵan. Parktiń negizgi ıdeıasy da elor­danyń qarqyndy salynýyn qamta­masyz etý bolatyn», deıdi tóraǵa orynbasary.

Onyń aıtýynsha, zańnamaǵa sáıkes, arnaıy ekonomıkalyq aımaqtardyń jumys isteý merzimi 25 jyl dep bekitilgen. Bıyl, 2026 jyldyń 31 jeltoqsanynda «Astana – jańa qala» aımaǵynyń ýaqyty aıaqtalady. Qazir bólingen jerler tolyq ıgerilip, zaýyttar iske qosylǵan, qalǵan 10–15 paıyzy jyl sońyna deıin qurylysty aıaqtaýdy kózdep otyr. Aldaǵy ýaqytta bul aýmaq arnaıy mártebesin joıyp, kádimgi ındýstrııalyq aımaq retinde óz jumysyn jalǵastyrady.

Bas qalanyń qarqyndy ósýi jańa ón­di­ris kózderin, qosymsha jumys orynda­ryn ashýdy talap etedi. Osy maqsatta jer­gilikti bılik jańa jobalardy qolǵa aldy. Naqtyraq aıtqanda, «Astana-Tehno­polıs» aımaǵynyń sheńberinde №2 Indýs­trııalyq parktiń qurylysy josparlanyp otyr. Elordada ınfraqurylymy to­lyq damyǵan jańa ındýstrııalyq, logıstı­kalyq, agrarlyq aımaqtar qurylyp, sha­har ekonomıkasyna tyń serpin bermekshi.

Atalǵan jańa óndiristik aımaqtyń ınfraqurylymy men qurylys bary­sy týraly Infraqurylymdy damytý departamentiniń basshysy Aqan Nurǵojın baıandap berdi. «Jańadan boı kóteretin №2 Indýstrııalyq park oń jaǵalaýda, burynǵy qar polıgonynyń ornynda salyn­baqshy. Onyń kólemi 400 gektar­dan astam aýmaqty qamtıdy. Qazir memle­kettik-jekeshelik seriktestik jobasy aıasynda «BCN Group» kompanııasy jobalaý jumystaryn júrgizip jatyr. Infraqurylym júıelerin jetkizýdiń barlyq jospary ázirlený ústinde. Bıyl jobany memlekettik saraptamaǵa ótkizý kózdelgen, sodan keıin qurylys-montajdaý kezeńi bastalady. Ákimdik jos-paryna sáıkes, bıyl kúz mezgiline deıin alǵashqy kezeńniń jumystaryna kirisý mindeti tur», deıdi departament jetekshisi.

Jańa ónerkásiptik aımaqtardy ashý ıdeıasy kásipkerler men ınvestor­lar ta­rapynan túsken joǵary suranysqa negiz­delgen. Shahardyń damýy halyq­ara­lyq kapıtal tartýǵa, zamanaýı nysan­dar turǵyzýǵa tikeleı baılanysty. Ekin­shi iri joba – «Astana-Tehnopolıs» sheńberinde qurylatyn Logıstıkalyq park. 200 gektarǵa jýyq aýmaqty alatyn bul park­te A jáne A+ sanatyndaǵy joǵary standartty qoımalar boı kóteredi. Qazir jer telimderin anyqtaý, daıyndaý sharalary júrip jatyr. Investorlarǵa jer berilip, olar óz qarajatyna zamanaýı logıstıkalyq keshender salady.

Úshinshi mańyzdy baǵyt – Agrarlyq ındýstrııalyq aımaq qurý. Bul joba­nyń máni men maqsatyn Sábıt Muhammed­januly bylaı dep túsindirdi: «Agrarlyq ındýstrııalyq aımaq elordanyń azyq-túlik qaýipsizdigin nyǵaıtý, tamaq óner­kásibin damytý maqsatynda qolǵa alyndy. Bul qadam jergilikti ónimderdiń órken­deýine úlken serpin bermekshi. Qazir oń jaǵalaýdaǵy óndiristik aımaqta arnaıy terrı­torııa belgilenip, bul jobanyń tehnıkalyq-ekonomıkalyq negizdemesi memlekettik saraptamanyń qaraýynda jatyr. Tamaq ónerkásibiniń sanıtarlyq qorǵaý aımaǵy úlken bolatyndyqtan onyń mańyna basqa óndiristik nysandar salýǵa ruqsat berilmeıdi. Sol sebepti tamaq óndirisin bir jerge shoǵyrlandyrýdy jón kórdik. Búginde osy baǵytta jumys isteýge nıetti sheteldik, otandyq ınvestorlarmen kelissózder júrgizilip, tıimdi usynystar daıyndalyp jatyr», dedi ol.

Elordada jańa óndiristik, logıstı­kalyq, agrarlyq aımaqtardyń qurylýy qala ekonomıkasynyń áleýetin arttyryp qana qoımaı, myńdaǵan turǵyndy turaqty jumyspen qamtýǵa jol ashady. Investısııa tartýdyń mundaı keshendi tetikteri bas qalanyń turaqty damýynyń kepili bolary anyq. Búginde elordalyq AEA-ǵa tartylǵan ınvestısııalar kólemi 693 mlrd teńgeden, óndirilgen ónim kólemi 103 mlrd teńgeden asty.