Premer-mınıstr Oljas Bektenov Qytaı Halyq Respýblıkasynyń Gonkong Arnaıy ákimshilik aýdanynyń Basshysy Djon Lımen kezdesý ótkizdi.
Kelissóz barysynda saýda-ekonomıkalyq yntymaqtastyqty arttyrý perspektıvalary talqylandy. Atap aıtqanda, kóliktik-logıstıkalyq marshrýttardy damytý, ınvestısııalyq yntymaqtastyqty keńeıtý tetikteri, sondaı-aq sıfrlandyrý, bilim berý jáne týrızm salasyndaǵy birlesken jobalar qaraldy.
«Qytaımen ózara tıimdi qarym-qatynasty damytý – Qazaqstannyń syrtqy saıasatynyń basty basymdyqtarynyń biri. Búginde qazaq-qytaı áriptestigi buryn-sońdy bolmaǵan deńgeıge jetti jáne tatý kórshiliktiń, ózara senimniń jáne uzaqmerzimdi yntymaqtastyqtyń úlgisin kórsetip otyr. О́tken jyl saıası dıalogtiń qarqyndylyǵy turǵysynan erekshe mańyzdy boldy. Memleket basshylary deńgeıindegi ózara saparlar men kezdesýler ekijaqty yntymaqtastyqtyń barlyq spektrine qýatty serpin berdi», dedi Úkimet basshysy.
Djon Lı júrgizilgen kelissózderdiń nátıjesi Qazaqstan men Gonkong arasyndaǵy áriptestikti odan ári keńeıtetinin aıtty. Onyń sózinshe, Gonkong pen Qytaıdyń bıznes qaýymdastyǵy elimizdi Ortalyq Azııadaǵy basty seriktesteriniń biri retinde baǵalaıdy.
«Biz sizdiń Prezıdentińizdiń basshylyǵymen qysqa ýaqyt ishinde qol jetkizgen áserli, turaqty ekonomıkalyq ósýdi kórip otyrmyz. Qazaqstan úlken múmkindikterge, al Qytaımen qarym-qatynas strategııalyq jáne uzaqmerzimdi sıpatqa ıe. Osy sapardyń qorytyndysy odan arǵy yntymaqtastyqtyń eleýli áleýetine jáne «habtan habqa» áriptestik modelin damytýdyń qolaıly perspektıvalaryna degen senimimizdi odan ári nyǵaıtty. Sizdiń elińiz Azııa men Eýropa arasyndaǵy negizgi kólik-logıstıkalyq marshrýttardyń qıylysynda bola otyryp, Ortalyq Azııada strategııalyq orynǵa ıe», dedi Djon Lı.
Kezdesýde saýda-ekonomıkalyq baılanystardy keńeıtý máselesine erekshe nazar aýdaryldy. Búginde Qytaı Qazaqstannyń eń iri saýda seriktesteriniń biri sanalady. О́tken jyly eki el arasyndaǵy taýar aınalymy 48,7 mlrd dollarǵa jetken. Al Qazaqstan men Gonkong arasyndaǵy saýda kólemi bir jylda 40 paıyzǵa ósip, 180 mln dollarǵa deıin ulǵaıǵan. Taraptar aldaǵy ýaqytta ekonomıkalyq yntymaqtastyqty jańa deńgeıge shyǵarýǵa múmkindik beretin «Qazaqstan – Shyńjań – Gonkong» formatyndaǵy ózara is-qımyl tetigin damytý máselesin talqylady. Bul alań taýarlar men qyzmetterdiń qozǵalysyn jandandyryp, birlesken jobalardy júzege asyrýǵa jol ashpaq.