Qytaı elin tanyp-bilýge búginde álemniń ár memleketi ózinshe kúsh salýda. Al Qytaı Halyq Respýblıkasy bolsa óz eliniń halyqaralyq arenadaǵy bedel-abyroıyn arttyrýda, ósip-órkendeý jolyndaǵy jańa serpilisterin pash etýde álem halyqtarynyń aldaryna jańasha beınemen, jańasha qyrlarymen kórinip keledi.
Jýyrda, elordadaǵy Ulttyq akademııalyq kitaphanada Leoý Nın ýnıversıtetiniń professory Sý Shý Iаnnyń “Qytaıtaný” kitabynyń tusaýkeser rásimi ótkizildi. Bul is-sharaǵa qazaqstandyq qytaıtanýshy ǵalymdar, tarıhshylar, ádebıet pen óner salasyndaǵy zııaly qaýym, qytaı mádenıetine qyzyǵýshy oqyrmandar men QHR Aqparat mınıstrliginiń janyndaǵy baspa isi jáne basylymdar jónindegi Bas basqarmanyń bastyǵy, QHR-dyń Qazaqstandaǵy elshisi Chjoý Lı jáne Qytaıdan kelgen birqatar memlekettik baspasynyń basshylary qatysty.
Kitap avtory Qytaı qandaı el, qandaı erekshelikterge ıe, adamzat tarıhynyń damýyna qandaı úlester qosty degen syndy suraqtarǵa jaýap izdegen. Eldiń tarıhı damý joldary, ejelgi mádenıeti san myń soqpaqty asýlary men búgingi jetistikteri jaıly syr shertedi.
Kitapty qytaı tilinen qazaq tiline Dýlat Málikuly, Bek Dókeıuly, Serik Kenenbaı syndy kásibı aýdarmashylar tárjimalapty.
Tusaýkeser rásimde sóz sóılegen QHR-dyń Qazaqstandaǵy elshisi Chjoý Lı bul kitaptyń qazaq tilinen basqa aǵylshyn, fransýz, ıspan, túrik, nemis tilderine aýdarylyp, 10 myńdaǵan danamen taralyp otyrǵanyn tilge tıek etti. “Kitap qazaq jurtynyń Qytaı memleketimen jiti tanysýyna mol múmkindik jasaıdy. Eki halyq arasyndaǵy dostyq baılanysty odan ármen bekemdeı túsetinine senimdimin”, – dedi sóz sońynda elshi.
Araı ÚIRENIShBEKQYZY.