Qor qyzmetinde kinárat joq

Keshe Premer-Mınıstr, Dırektorlar keńesiniń tóraǵasy Kárim Másimovtiń qatysýymen “Samuryq-Qazyna” qory basqarmasynyń keńeıtilgen otyrysy bolyp ótti. Otyrysta sóz alǵan qor bas­qar­masynyń tóraǵasy Qaırat Kelimbetov Úkimettiń daǵdarysqa qarsy baǵdarlamasyn júzege asy­rý­daǵy eń belsendi kezeńniń 2009 jylǵa sáıkes kelgennin atap ótti. Bıylǵy jyly qor jumysynda eko­nomıkany modernızasııalaýǵa yqpal jasaýǵa jáne qor kompa­nııa­laryndaǵy korporatıvtik bas­qa­rýdy jetildirýge basymdyqtar berilip otyr. Birinshi baǵyt boıynsha úde­me­li ındýstrııalyq-ınnovasııalyq da­mýdyń memlekettik baǵdarlama­syn­daǵy jobalardy júzege asy­rýǵa mańyzdy ról bólinedi. Osy­laısha eldi ındýstrııalandyrý kartasy sheńberinde 43 mıllıard AQSh dollary turatyn jobalardy júzege asyrý josparlanyp otyr. Osy qarjynyń 22 mıllıard dol­lary nemese 50 paıyzdan astamy qordyń úlesine tıesili. Indýs­trııalandyrý kartasyna qordyń 53 jobasy enip otyr. Olardyń 35-i respýblıkalyq mańyzdaǵy, 18-i óńirlik jobalar bolyp tabylady. Joǵaryda atalǵan 53 jobanyń 32-sin Qazaqstannyń Damý banki ar­qyly júzege asyrý kózdelýde. Al qalǵan 21-i “QazMunaıGaz”, “Qa­zaq­stan temir joly”, KEGOK, “Samuryq-Energo” sııaqty enshiles kompanııalar arqyly júzege asyrylatyn bolady. Jobalar belgilengen keste boıynsha júzege asýda. Birinshi jartyjyldyqta qor segiz joba boıynsha qurylys-montaj ju­mys­taryn júzege asyrdy. Jyl so­ńyna deıin taǵy da jalpy ın­vestısııalyq kólemi  13 mıllıard dollardan asatyn qosymsha 8 ınvestısııalyq jobalar boıynsha qurylys-montaj jumystary bastalatyn bolady. Qolǵa alynǵan jobalardyń túgeldeı júzege asýy 8 myńnan astam turaqty jumys oryndaryn ashýǵa jaǵdaı týǵyzbaq. Al qury­lys barysynda 50 myńnan astam adam jumysqa tartylmaqshy. Indýstrııalandyrý kartasyna engen jobalardyń júzege asýyn uıymdastyrý úshin qor janynan basqarý ortalyǵy quryldy. Beki­tilip berilgen barlyq jobalar boıynsha jumys toptary jumys isteıdi. Q.Kelimbetovtiń atap ótkenin­deı, birinshi jartyjyldyqtaǵy qarjylyq eseptiliktiń aldyn ala málimetterine qaraǵanda taza tabys­tyń jıyntyq jospary 12 iri kompanııalar jáne qordyń kor­poratıvtik ortalyǵy boıynsha eki esege artqan. Osylaısha qor­dyń ortaqtastyrylǵan taza ta­bysy 2010 jyldyń alǵashqy jar­tyjyldyǵynyń qorytyndysy boıynsha shamamen 200 mıllıard teńge bolmaq. Qor tóraǵasynyń aıtýynsha, jyl qorytyndysynda negizgi óndiristik jáne qarjylyq kórsetkishter boıynsha ústimizdegi jyldyń jospary tolyq oryn­dalatyn bolady. Otyrysta sóz sóılegen Úkimet basshysy qor aldyna birneshe naqtyly mindetter belgiledi. “Egemen-aqparat”.