Jambyl oblysynyń ákimi Qanat Bozymbaevtyń óńirdegi alǵashqy aýqymdy isteriniń biri oblys ortalyǵyndaǵy Hıbatýlla at-Tarazı meshitiniń janyndaǵy bastalmaı jatyp tastalǵan medrese qurylysyn qolǵa alýdan bastalǵan bolatyn. Búginde bul ıgilikti is oıdaǵydaı aıaqtalyp keledi. Ári-beri ótken saıyn múmin musylmandar qurylysshylardyń qarqyndy isterine kýá bolyp, “joqtyń túbi joǵalar, bardyń túbi ońalar” degen osy eken-aý” dep, ishteı rıza bolyp qalady.
Janyna ımandy joldas etken osy ákim endi Ramazan aıynyń alǵashqy jumasyn da qur jibermeı, Oraza ustap, aýyz bekitken ulttar men ulystardyń múminderin bir dastarqan basyna shaqyryp, aýyz ashar berdi. Bul iltıpatqa Alladan basqa eshbir táńir joq ekenine jáne Muhammed Allanyń elshisi ekenine kýálik etken musylmandar qaýymy dán rıza bolyp qaldy. О́ıtkeni, Muhammed (s.a.ý.) Paıǵambarymyz “Ramazan aıynyń basy – meıirim, ortasy – keshirim, aıaǵy – tozaq otynan azat bolý” degen eken.
Qudaıǵa shúkir, táýelsizdik alǵaly beri elde tilimiz ben dinimizdiń keregesi keńip, shańyraǵy bıikteı bastady. Bosaǵasy da berik. Meshitter men medreseler kóbeıip, namaz oqyp, zeket berip, oraza ustaǵan ımandy jandar sany da arta tústi. Qarjysy jetkender Mekke men Medınege qajylyqqa da barýda.
Jánnat esikteri ashylyp, tozaq esikteri jabylyp, shaıtandar shynjyrlanǵan Ramazan aıynda aýyz ashar berý óte saýapty is ekeni belgili. “Biz, tegimiz – túrik, dinimiz – ıslam ekenin umytpaýymyz kerek” degen Elbasy Nursultan Nazarbaevtyń ǵıbratty sózi de osyndaı nyǵymetterdi quptap, qoldaıtynyn kórsetedi.
Kósemáli SÁTTIBAIULY, Jambyl oblysy.