Jas talanttardyń jarqyn talaby

Qoǵamnyń qaı salasyn alyp qa­rasaq ta jigerli, yntaly, ómirge de­gen kózqarastaryn san túrli jol­dar­men jetkize biletin jas tolqynnyń ósip kele jatqanyna kýá bolasyz. Olaı bolýy zańdy da. О́mir bolǵan soń, tolqyndy tolqyn basýy tıis emes pe! Sýret óneri – adamnyń ishki jan dúnıesin súısindiretin, ómirdiń qy­zyǵy men qıyndyǵyn, qýanyshy men qaıǵysyn túrli boıaýlarmen beıne­legende erekshe bir shattyq syılaıtyn ónerdiń bir túri. Bul salada da bolashaqta ataqty qylqalam sheberleri bolýǵa laıyq talantty jas órender ósip kele jatqanyn senbi kúni elor­dadaǵy “Saryarqa” saýda orta­lyǵynda ashylǵan “Jas óner” atty kórmeden kýá bolyp qaıttyq. Jas sýretshiler men músinshilerdiń bul alǵashqy kórmesin uıymdastyrýǵa Mádenıet mınıstrligi men “Altyn kún” qoǵamdyq qory muryndyq bol­ǵan. Kórmege elimizdiń ár óńirinen kel­gen beıneleý ónerine yntasy joǵa­ry qylqalam sheberlereniń 100-ge jýyq týyndylary qoıylǵan. Kenep, maıly boıaý, terilerdi paıdalanǵan jas sýretshilerdiń qylqalamdarymen som­daǵan taqyryptary san-alýan. Hal­qymyzdyń salt-dástúri men elor­danyń jańarǵan ómir tynysy, tabıǵat kórinisteri, abstraktili qııal-ǵajaıyp oı jetistikterinen beınelengen kó­rinister kórmege kelýshilerdiń janyn bir jadyratqandaı boldy. “Búgingi jas sýretshilerdiń jetis­tikteri erekshe. Minekeı, ár stılde birneshe jumys qoıylyp otyr. As­tanada tuńǵysh ret uıymdastyrylǵan mundaı kórme bolashaqta da óz jal­ǵa­syn tabatynyna senimdimin” – degen Astana qalalyq Sýretshiler odaǵynyń basqarma tóraǵasy Qońyr Muha­me­dıev kórmeniń ashylý saltanatynda jas sýretshilerdiń eńbekterin joǵary baǵalap, sondaı-aq óziniń aǵalyq aqyl-keńesterin de jas sýretshilerge arnady. Kórmege ár sýretshiden kem de­gende 3 týyndy qoıylǵan. Bul sýret­terdiń satylý baǵasy da ártúrli. 18 myń teńgeden bastap 2 myń AQSh dollaryna deıingi kórkem týyndyny osy kórmeden kezdestire alasyz. Shara sońynda jas ónerpazdarǵa As­tana qalasy Jas sýretshiler oda­ǵynyń bıletteri úlestirildi. Araı ÚIRENIShBEKQYZY.