О́SKEMEN. 19 qańtar. Qazaqstan quramasynyń sapynda Álem chempıonatynda óner kórsetken shyǵysqazaqstandyq hokkeıshilerdi jerlesteri úlken qurmetpen kútip aldy. Bul týraly egemen.kz tilshisi habarlady.
Avstrııada ótken álemdik dodada laıyqty óner kórsetken úshin 12 hokkeıshini óńir jurty О́skemen qalasynyń temir jol vokzalynan qushaq-qushaq gúlmen, qoshemetpen qol soǵyp turyp qarsy aldy.
Avstrııanyń Shpıttal-an-der-Draý qalasyndaǵy birinshilikte hokkeıden elimizdiń áıelder quramasy qola medalǵa qol jetkizgen bolatyn. Sondaı-aq, bıyl ulttyq qurama komandanyń basym bóligin óskemendik hokkeı mektebiniń túlekteri qurady. Komandanyń bas jattyqtyrýshysy – halyqaralyq jáne joǵary ulttyq dárejedegi tóreshi Irına Mogılnıkova.
Aıta keteıik, áıelder arasyndaǵy álem birinshiligi (U18) 7-11 qańtar aralyǵynda ótti. Qazaqstan quramasy Rýmynııa, Qytaı, Avstrııa, Ulybrıtanııadan kelgen myqty qarsylastarymen kezdesip, 4 oıynda 3 jeńiske qol jetkizdi.
Dýman Anash.
Derek, sýret: egemen.kz.