О́SKEMEN. 19 qańtar. Shyǵys Qazaqstan oblysynda Táýelsizdiktiń 25 jyldyq mereıtoıy aıasynda «Bir el – bir taǵdyr!» atty aýqymdy aksııa ótti. Bul týraly egemen.kz tilshisi habarlady.
Bıyl Táýelsizdik mereıtoıy sheńberinde keshendi is-sharalar legi uıymdastyrylady. Osy sharalardyń máresi ispetti «Bir el – bir taǵdyr!» aksııasy oblys ortalyǵyndaǵy Ertis ózeniniń sol jaǵalaýyndaǵy Komsomol aralynda ótti. «Jas Otan» jastar qanaty men oblystyq Qazaqstan halqy Assambleıasynyń qoldaýymen ótken saltanatty shara teatrlandyrylǵan horegrafııalyq kompozısııamen bastaldy. Shara barysynda qatysýshylar muz aıdyny ústinde Táýelsizdik mereıtoıyn bildiretin «25» sanyn sap qurap belgilese, taǵy birqatar jastar 25 shaqyrymǵa shańǵy jarysyn uıymdastyrdy. Oǵan oblys ortalyǵynyń turǵyndary men sportshylar qatysty. Sonymen birge muz aıdynynda «Torpedo» komandasynyń hokkeıshileri men mánerlep syrǵanaý sheberleri, qala mektepteriniń oqýshylary óz ónerlerin pash etti.
Bul sharaǵa oblys ákiminiń orynbasary Jaqsylyq Omarmen birge Olımpıada chempıony Olga Rypakova da qatysyp, jastardy óz eli men jerin, Otanyn qadirlep, qasterleýge shaqyrdy.
«Bıylǵy jyldyń elimiz úshin mańyzy zor. О́ıtkeni, Táýelsizdigimizdiń 25 jyldyǵyn atap ótemiz. Osy ýaqyt aralyǵynda elimiz kóptegen qıyndyqtar men synaqtardy eńserdi. Búginde biz úlken bıikti baǵyndyrǵan elmiz. Sebebi, Prezıdentimizdiń sarabdal saıasatynyń arqasynda Qazaqstandy búkil álem tanydy. Sondyqtan, memleketimizdiń odan ári qaraı ósip-órkendep, gúldene berýine tilektespiz», – dedi Olga Rypakova.
Atalǵan aksııa A.Pýshkın atyndaǵy oblystyq kitaphanada «Erkin eldiń kemel tulǵalary» atty kitap jáne kartınalar kórmesimen jalǵasyp, jas býynǵa memlekettiń damý tarıhynda ózindik orny bar ǵıbratty ǵumyrnamalar tanystyryldy. Sondaı-aq qala jastary belgili bloger Rınat Halıkovpen kezdesip, «El Táýelsizdigi – bizdiń qasıetti qundylyǵymyz!» taqyrybynda pikirtalas uıymdastyrdy. Aksııa sońy óńirdegi 19 qala men aýdannyń shyǵarmashylyq ujymdarynyń qatysýymen oblystyq drama teatrynda ótken «Týǵan el – altyn besigim!» gala-konsertimen aıaqtaldy.
Dýman Anash.
Derek, sýret: egemen.kz.