ALMATY. 19 qańtar. Almatyda «Múgedekterdi Májiliske jáne Máslıhatqa saılaý» taqyrybynda baspasóz máslıhaty ótti. Bul týraly egemen.kz tilshisi habarlady.
Qazaqstan baspasóz klýby uıymdastyrǵan jıynǵa Qazaqstan múgedekter uıymy odaǵynyń tóraǵasy Álı Amanbaev, «Shyraq» múgedektigi bar áıelder qaýymdastyǵynyń tóraıymy Lázzat Kaltaeva, «Namys» joǵary bilimi bar múgedekter qoǵamdyq birlestiginiń tóraǵasy Qaırat Imanalıev qatysyp, kóterilgen máselelerge qatysty ustanymdaryn bildirdi.
«Búgingi tańda Múgedekterdiń quqyqtary týraly konvensııa bekitilgen. Osy Konvensııaǵa sáıkes múgedekter múgedektigi bar adamdarǵa baılanysty túrli strategııalardy, saıasatty jáne baǵdarlamalardy ázirleýge qatysýy tıis. Sonymen qatar, bul Konvensııa múgedekterdi úkimettiń atqarýshylyq jáne zań shyǵarýshy organdarynyń jumysyna belsendi qatysýǵa shaqyrady Osyǵan oraı, Májilistiń óz erkimen taraǵany týraly jáne Májilis pen Máslıhatqa qos saılaýdy qatar ótkizý jaıly sheshimdi qoldaımyz. Ulttyq deńgeıde Májiliske jáne aımaqtyq deńgeıde Máslıhatqa múgedektigi bar adamdar arasynan depýtat saılaıtyn ýaqyt keldi. Múgedekter arasynda zań aktilerin ázirleýge, túrli zertteýler júrgizýge, arnaıy áleýmettik qyzmet usyný baǵdarlamalaryn jasaýǵa belsene qatysqan joǵary bilimdi jandar bar. Sondyqtan, ondaı adamdardyń Parlament jáne Máslıhat jumystaryna qatysýy qajet dep oılaımyz. Olardyń bilek túrip, ulttyq jáne aımaqtyq deńgeıde zań shyǵarý qyzmetine belsene aralasýy múgedekterdiń turmys sapasyn joǵarlatý úshin laıyqty jaǵdaı jasaýǵa múmkindik beredi. Barlyq partııalardy Májiliske jáne Máslıhatqa ózderiniń saılaý tizimderine múgedekter uıymdarynyń ókilderin engizýge shaqyramyz», – dedi baspasóz máslıhatynda sóz alǵandar.
Aınash Esalı.
Derek, sýret: egemen.kz.