Reseı jáne Qazaqstan temirjoldarynyń basshylary ortaq qadamdaryn belgiledi
Máskeýde «Reseı temir joldary» AAQ prezıdenti Oleg Belozerovtiń «Qazaqstan temir joly» AQ basshysy Asqar Mamınmen kezdesýi bolyp ótti. Kezdesýde Birlesken kólik-logıstıkalyq kompanııasyn (BKLK) ári qaraı damytý máseleleri talqylandy.
BKLK qurý EAEO keńistiginde kóliktik-logıstıkalyq qyzmetter kórsetýdiń tehnologııalary men standarttaryn engizý úshin birtutas ıntegrasııalyq tuǵyrnama ornatýǵa irgetas qalasa, bul óz kezeginde, transqurlyqtyq marshrýttarda tasymal aǵynyn qaıta baǵdarlaý úshin kúsh biriktirýge jáne jahandyq básekege qabiletti Eýrazııalyq dáliz qalyptastyrýǵa múmkindik berdi.
Osyǵan oraı, taraptar BKLK jumysynyń alǵashqy praktıkalyq nátıjeleri kompanııanyń – konteınerlik servıstik qyzmetter kórsetýdiń ıntegratorynyń bıznes-ıdeıasynyń durystyǵyn qýattap bergenin atap kórsetti.
Taraptar BKLK-nyń bıznes-modelin tabysty júzege asyrý úshin ulttyq jobalardyń kóliktik-logıstıkalyq ınfraqurylymdaryn damytý salasynda ulttyq jobalardy úılestirýdi jalǵastyrý qajet ekenin atap ótip, júkterdi jetkizý men uzaq merzimdi tarıftik saıasat júrgizý, konteınerlik poıyzdar qozǵalysynyń kestesin sáıkestendirý ótpeli logıstıkalyq qyzmetterge kepildik beretinin kóldeneń tartty.
Atalǵan sharalar BKLK-ǵa rynoktyń ózgeristerine der kezinde qaıyrylýǵa, oǵan qatysýshylarǵa barynsha básekege qabiletti logıstıkalyq ónim usynýǵa múmkindik beredi.
«Birlesken kólik-logıstıkalyq kompanııasy» AQ Eýrazııalyq ekonomıkalyq odaqqa qatysýshy elder – Belarýs, Reseı jáne Qazaqstan temirjol ákimshilikterimen 2012 jyldyń 31 mamyryndaǵy Birtutas ekonomıkalyq keńistiktiń (BEK) kóliktik-logıstıkalyq júıesin damytý týraly memorandýmmen jáne Joǵary Eýrazııalyq ekonomıkalyq keńestiń 2013 jyldyń 29 mamyryndaǵy kóliktik-logıstıkalyq júıeni damytý jáne qatysýshy elderdiń tranzıttik áleýetin júzege asyrý jónindegi sheshimimen bekitilgen ýaǵdalastyqtarǵa sáıkes 2014 jyldyń 13 qarashasynda qurylǵan bolatyn.
«Egemen-aqparat».