ASTANA. 20 qańtar. Belgili boksshy, birneshe jyl qatarynan asa aýyr salmaqta ulttyq quramanyń beldi múshesi bolǵan Rýslan Myrsataev 30 qańtar kúni kásipqoı bokstaǵy alǵashqy jekpe-jegin ótkizedi. Boks keshi Almatydaǵy Royal Tulip qonaq úıinde ótedi. Otandasymyzdyń qarsylasy – Reseı boksshysy Valerıı Zamıralov. Bul týraly inboxing.kz saıtyna silteme jasaǵan egemen.kz tilshisi habarlady.
Sonymen qatar, bul kúni Aıdos Erbosynuly, Berikbaı Nurymbetov, Nursultan Qabdýlov jáne taǵy basqa qazaqstandyq boksshylar kezekti reıtıngtik kezdesýlerin ótkizedi. Solardyń ishinde Myrsataev pen Zamıralovtyń jekpe-jegi keshtiń basty aıqasy retinde atalyp otyr.
Boks saıysy BM Global jáne Diamond Ring JShS-leriniń, sondaı-aq, Qazaqstan kásipqoı boks federasııasynyń uıymdastyrýymen ótkiziledi.
Aıta keteıik, Rýslan Myrsataev ulttyq qurama sapynda 2008 jyly Qytaı astanasy – Beıjiń qalasynda ótken Olımpıalyq Oıyndarǵa qatysty. Odan bólek, ol «Astana arlandary» komandasymen birge Búkilálemdik boks serııasy saıysynyń chempıony atandy.
Elaman Qońyr.
Derek: inboxing.kz.
Sýret: inboxing.kz, yvision.kz.