Fınlıandııa da alys emes

Qazir mańdaıdy shyt oramalmen shart baılap, shapannyń bir etegin belbeýge qystyryp, kóldeı oramalmen mańdaıdyń terin bir súrtip, aı júzdi ketpenmen jer aýdarý ótken shaq bolyp qaldy. Tyńaıtqysh degende qoı, sıyrdyń qys boıǵy jınalǵan kóńin aıdalǵan jerge tógip, tyńaıtqysh berdim dep maldanýdyń da kúni kelmeske ketip barady. Jańa tehnologııasy qarysh­tap damyǵan Amerıka, Eýro­pa jáne Qytaı sharýalary jerinen bir ýys topyraq alyp topyraq zertteý ınstıtý­tyna tapsyrady. Zertteýdiń nátıjesi boıynsha jeriń jyl saıyn salatyn kóńge zárý emes, aǵzasy basqa tyńaıtqyshtardy qalaıdy eken. Osylaısha, baıaǵydaı demaldyrýǵa bos tanap qaldyrmaı jyl saıyn mol ónimniń astynda qalasyz. Mol ónim – mol tabys. Oń­tústikte tamshylatyp sýarý men mıneraldy tyńaıtqyshtardy paıdalaný boıynsha aýyl­sha­rýashylyq semınary ótkende joǵarydaǵy jaıttar taǵy da baıqalyp qaldy. Oblystyq Kásipkerlik mektebi men «Kos­AgroKommers» kompanııasy birlesip ótkizgen semınarda dıqandarǵa jabyq topyraqta qyzanaq, qııar jáne alma túp­terin tamshylatyp sýarýda sýda tez erıtin Calcinit pen Kristalon tyńaıtqyshtarynyń jańa túrleri tanystyryldy. Se­mınarǵa arnaıy shaqyrylǵan fınlıandııalyq «Yara» kompanııasynyń ókili Ýlla Sýndel IOS jáne Android platformalarynan tabýǵa bolatyn «Yara CheckIT» mobıldi qosymshasyn da tanystyrdy. Baǵdarlamanyń ishinde ósimdiktiń aýrýǵa shaldyǵýynyń sebebin anyqtap, onyń aldyn alatyn emdeý amaldary týraly nusqaýlyqtar ornalasqan. Bul jobaǵa dúnıejúziniń elý memleketiniń agronomdary joǵary baǵa bergendigi aıtyldy. Endi aýyl sharýashylyǵyndaǵy álemdik jańa tehnologııanyń jetistigin ońtústikqazaqstandyq sharýalar da kóretin bolady. Buǵan qosa aıtarymyz, Ońtústik dıqandary az jerden kóp daqyl alýǵa bolatyn ıtalııalyq tehnologııany erkin meńgergen. Sál jel soqsa saý etip jerge tógiletin, shuryq tesik almalar ornyna symǵa kerip ergejeıli boıly alma kóshetterin kóptep otyrǵyzyp jatyr. Qońyr kúzde osy áljýaz kóshetter shybyǵy jerge tıerdeı bolyp jemis salady. Úlkendigi kárlen kesedeı, dámi jartysy bal, jartysy qant. Oblys ákimdiginiń uıytqy bolýymen sheteldik úzdik tehnologııa Ońtústik jerin osylaısha jersinip jatyr. Baqtııar TAIJAN, «Egemen Qazaqstan». Ońtústik Qazaqstan oblysy.