ASTANA. 9 naýryz. Belgili Samsung jáne Philips kompanııalary 3D tehnologııasy bar teledıdar shyǵarýdan bas tartty. Bul týraly iphones.ru saıtyna silteme jasaǵan egemen.kz tilshisi habarlady.
Forbes basylymynyń habarlaýynsha, Philips basshylyǵy mundaı sheshimge kelgenderin Belgııada ótken jıyndardyń birinde aıtqan. Kompanııa dırektory Dennı Tektiń aıtýynsha, 3D tehnologııany qazirgi kezde eshkim qajet etpeıdi.
Al Samsung 3D tehnologııadan bas tartqany jóninde resmı habarlamasynda málimdegen. Olar óz sheshimin teledıdardyń mundaı túrine suranystyń azdyǵymen jáne qajetti kontenttiń kóp emestigimen túsindirdi. Osyǵan baılanysty 3D teledıdarlarǵa arnalǵan kózildirik shyǵarýdy eki esege azaıtty. Kompanııa basshylyǵy suranysqa ıe bolǵan kvantty núkteleri bar dıspleıli SUHD TV teledıdaryna basa nazar aýdarýdy josparlap otyr.
Aıta keteıik, osyǵan deıin LG kompanııasy atalǵan tehnologııa túrindegi teledıdarlar sanyn eki esege azaıtqan bolatyn.
Aıan Ábdýálı.
Derek: iphones.ru.
Sýret: donbass.ua.