Kináliler jumysynan bosatyldy

Qaraǵandy oblysynyń ákimi Nurmuhambet Ábdibekov kúıdirgi («Sibir jarasy») aýrýy shyqty degen Shet aýdanyndaǵy Erkindik aýylyna arnaıy baryp, jergilikti halyqpen kezdesý ótkizdi. Jıyn barysynda veterınarııa qyzmeti men ınspeksııasynyń, tutynýshylar qu­qyǵyn qorǵaý departamentiniń ókilderi, jergilikti polısııa qyzmetkerleri tótenshe oqıǵa bolǵan jerdegi atqarylyp jatqan jumystar jóninde baıandady. Sondaı-aq, kezdesý barysynda turǵyndardyń kóptegen suraqtaryna jaýap berildi. Jıynnan keıin oblys basshysy juqpaly aýrýdan qaıtys bolǵan marqumdardyń otbasyna baryp, týǵan-týystaryna kóńil aıtty. Osynyń aldynda habarlaǵanymyz­daı, kúıdirgi aýrýy shyqty degen kúdikpen Shet aýdanynyń Erkindik aýylynda tó­tenshe jaǵdaı tártibi jarııalanyp, 15 kún merzimge karantın engizilgen bolatyn. Qazirgi tańda aýyl turǵynynyń dertti maldy soıyp, etin týystaryna taratyp, kórshilerine satqany anyqtaldy. Osy tótenshe oqıǵa boıynsha QR Qylmystyq kodeksiniń 327-baby, 1-tarmaqshasy (Epı­zoottyq nemese basqa da aýyr zardaptardy taratýǵa ákep soqtyrǵan veterınarııa erejesin buzý) boıynsha qylmystyq is qozǵalyp, sotqa deıingi tergeý amaldary júrgizilip jatyr. Qaraǵandy oblystyq densaýlyq saqtaý basqarmasynyń málimeti boıynsha, 19-21 maýsym aralyǵynda oblystyq juqpaly aýrýlar aýrýhanasyna kúıdirgi dıagnozy kúdigimen 8 adam jetkizilgen bolatyn. Olardyń ekeýi – 49 jastaǵy er adam men 33 jasar áıel kóp uzamaı kóz jumdy. Bulardyń bári de Erkindik aýylynyń turǵyndary. Budan buryn oblys ákimi juqpaly aýrýlardyń oshaǵyn joıý jáne  olardyń aldyn alý boıynsha qurylǵan shtabtyń kezekti otyrysyn ótkizip, birqatar laýazymdy tulǵalardy tártiptik jaýapkershilikke tartqan bolatyn. Atap aıtqanda, sala bo­ıynsha baqylaýdy álsiretip alǵan óziniń eki orynbasaryna, oblystyq densaýlyq saqtaý basqarmasynyń basshysyna sógis jarııalady. Al Qaraǵandy oblystyq veterınarııa basqarmasynyń basshysy qyzmetinen bosatyldy. Sondaı-aq, aýyl sharýashylyǵy men veterınarııa máselelerin qadaǵalaıtyn Shet aýdany ákiminiń orynbasary, aýdandyq veterınarııa bóliminiń basshysy, «Shet aýdanynyń veterınarlyq stansasy» KMK dırektory, Shet aýdanyndaǵy О́spen aýyl­dyq okrýginiń veterınar dárigeri qyzmetinen bosatylǵan bolatyn. Qaırat ÁBILDINOV, «Egemen Qazaqstan» Qaraǵandy oblysy