Qyzylordada at báıgesine 13 mln teńge tigildi

Eki márte Sosıalıstik Eńbek Eri, dańǵaıyr dıqan Ybyraı Jaqaevtyń 125 jyldyǵy aıasynda 23 qazan kúni Qyzylordada 13 mıllıon teńgeden astam júlde qoryn quraıtyn at báıgesiniń aqtyq saıysy ótti. Elimizdiń túkpir-túkpirinen kelgen ondaǵan shabandoz báıgeniń 5 túrinen synǵa tústi, - dep habarlaıdy Qyzylorda oblysy ákiminiń baspasóz qyzmeti. Oblys ákimi Qyrymbek Kósherbaev jınalǵan jurtshylyqty egin jınaý naýqanynyń aıaqtalýymen jáne dala akademıginiń mereıtoıymen quttyqtap, shabandozdarǵa sáttilik tiledi. "Sońǵy jyldary ulttyq sport túrleriniń  oblysymyzda buqaralyq sıpat alyp kele jatqany qýantady. Aımaqta 14 myńnan astam adam etnosporttyń 7 túrimen shuǵyldanady. Jyl saıyn oblysymyzda ótkiziletin "Altyn belbeý" týrnıri - respýblıkadaǵy  eń tanymal ári bedeldi básekeniń birine aınaldy. Sondaı-aq, bıylǵy jyly kókpardan Jańaqorǵan aýdanynda ótken 5-shi Qazaqstan chempıonatynda oblysymyzdyń qurama komandasy tuńǵysh ret qatysyp, ekinshi oryndy jeńip aldy. Kókpardan oblystyń jasóspirimder qurama komandasy eki márte kúmis júldeni ıelendi. Byltyr ulttyq sportty damytý maqsatynda salynǵan ıppodrom halyqaralyq jarystardy ótkizýge jáne óńirde at sportynyń órkendeýine múmkindik beredi", - dedi aımaq basshysy. At báıgesiniń qorytyndysy: kókpardan Jańaqorǵan aýdanynyń komandasy jeńiske jetip, 2 mıllıon teńgeni ıelendi; ekinshi oryndy jeńip alǵan shıelilikterge 1,5 mıllıon teńge berildi; úshinshi oryndy qanjyǵasyna baılaǵan Qyzylorda qalasynyń shabandozdary 500 myń teńgemen jáne tórtinshi oryndy jeńip alǵan  araldyqtar 250 myń teńgemen marapattaldy. "Teńge ilý" saıysynda birinshi oryndy (100 myń teńge) jańaqorǵandyq Altaı Qońqaev ıelendi. Ekinshi oryndy (75 myń teńge) jalaǵashtyq Dosbol Nurhan jeńip alsa, úshinshi oryndy (50 myń teńge) qyzylordalyq Janbolat Áliqojaev ıelendi. "Qunan báıgede" Almaty oblysynan kelgen Janqoılyqovtar áýletiniń "Qaratóbeli" jeńiske jetti. Shabandoz - О́tegen Aıtbek. Birinshi oryn úshin olar 1 mıllıon teńge aqshalaı syılyq ıelendi. Ekinshi oryn men 500 myń teńgeni qyzylordalyq Igenbaev Daneldiń "Elik" atty tulpary jeńip aldy. Shabandoz - Emıl Igenbaev. Al úshinshi orynǵa laıyq dep tanylǵan "Alataý" sáıgúliginiń ıesi almatylyq Aıbek Bahytbekke 300 myń teńge berildi. Shabandoz - Elshat Baımuhanov. "Toq báıgede" birinshi oryn men 1,5 mıllıon teńge aqshalaı syılyqqa Shıeli aýdanynan kelgen Maılybaevtar otbasynyń "Patsha" tulpary laıyq dep tanyldy. Ekinshi oryn men 1 mıllıon teńgeni astanalyq Nurdáýlet Mırastyń "Shaıkúreńi" jeńip aldy. Úshinshi oryndy ıelengen Janqoılyqovtar otbasynyń "Altynqozysyna" 500  myń teńge aqshalaı syılyq tabystaldy. "Alaman báıge" - saıystyń eń kúrdeli túri, shart boıynsha 25 shaqyrym qashyqtyqty baǵyndyrý kerek. "Alaman báıgede" taldyqorǵandyq Jeńis Smaıylovtyń "Baqtorysyn" tizgindegen Aqjol Jumataı úzdik shabandoz dep tanyldy. Jeńimpazǵa jol talǵamaıtyn kólik kilti tabystaldy. Al ekinshi oryn tarazdyq Melebek Nurdáýletke buıyrdy. "Batyr" atty tulpardyń ıesi - Asqar Oljabaev. Úshinshi oryn men 1 mıllıon teńge aqshalaı syılyq shyǵysqazaqstandyq Erlan Súleımenovtyń "Mırad" tulparyn tizgindegen Nurlan Jaqsylyqqa buıyrdy. Tórtinshi oryn úshin 500 myń teńgeni almatylyq Serik Baqıevtyń "Nurtorysy" ıelendi. Shabandoz - Arnur Qurmanjan. Aıta keteıik, at báıgesiniń demeýshileri - "QazGerMunaı" BK, "Mádi Qajy" JShS, "Jan-Araı" JShS, "Baıqońyr" ÁKK.