"Qazaq tarıh ǵylymy úshin iri oqıǵa". El gazetindegi jobalary jaıly pikirler

Búgin "Sıfrly Qazaqstan" baǵdarlamasy aıasynda "Egemen Qazaqstan" qolǵa alǵan jobalardyń tusaýkeserine qatysqan meımandar atalǵan jobalardyń mańyzy týraly pikir bildirdi. Biz sol pikirlerdiń birnesheýin usynyp otyrmyz. Ádil Ahmetov, ǵalym, «Egemen Qazaqstannyń» turaqty avtory: Búgin «Egemenniń» jańa deńgeıge kóterilgen sátin kórip otyrmyz. Qazir eńbektegen baladan, eńkeıgen kárige deıin kompıýterde jumys isteıdi. Kóp nárseni kompıýter arqyly oqıdy. Prezıdenttiń bıylǵy Joldaýynda «Sıfrly Qazaqstan» týraly aıtyldy. Mine, «Egemen» joǵary deńgeıden kórinip, mańyzdy sharany iske asyryp úlgerdi. Aımaqtaǵy jurt gazetti jazdyryp alsa, ortalyqtaǵy oqyrmandar kóbine dúńgirshekten satyp alady. Biraq «Egemen Qazaqstandy» dúńgirshekterden tabý qıyn bolǵandyqtan, jurt baspahanadan izdeıtin. Qazir kúndelikti tańerteń kompıýterdi qossańyz, gazettiń pdf-nusqasy kelip turady. Gazette saıasatty, ekonomıkany, mádenıetti tereń taldaıtyn maqalalar kóbeıdi. Búginde «Egemenniń» qamtymaıtyn salasy joq deýge bolady. О́te jaqsy oqylatyn gazetke aınaldy. Gazet álemdik basylymdardyń jetistikterin úlgi etip otyr. Mysaly, Financial Times gazetinde eń ózekti maqalalar birden kórinip turady. Qazirgi «Egemende» de solaı. Sırek fotolarǵa qatysty jobalar da mańyzdy. Fotoshejire degenimiz – tarıh. Foto da sóıleıdi. Sondaı qundy sýretterdi sıfrlap jurtshylyqqa usyný úlken jetistik dep oılaımyn. «Egemen Qazaqstannyń» oqyrmany qazir de kóp, oǵan suranys budan keıin de artady dep senemin». Myrzataı Joldasbekov, memleket qaıratkeri, ǵalym: «Jobalardyń bári iri jańalyqtar ekenin, óte mańyzdy, asa qajet sharýalardyń jasalyp jatqanyn kórip otyrmyn. Biz jańalyqtan keıin qalmaýymyz kerek. Búginde gazettiń mazmuny da jaqsardy - maqalalary qazir tez oqylady, gazettiń ózi de qolǵa ustaýǵa yńǵaıly boldy. «Egemen Qazaqstan» qazir qoldan túspeıtin gazetke aınaldy». Sultan Orazalınov, Qazaqstannyń eńbek sińirgen qaıratkeri: «Búgingi úsh jobanyń bireýi - búkil «Egemenniń» tarıhy. Al «Egemenniń» tarıhy - eldiń tarıhy. Men Ulttyq kitaphanadan gazettiń 1928 jyl men 1968 jyl aralyǵyndaǵy tigindilerin qarap shyqqan edim. Onda óte mańyzdy maqalalar bar. Olardyń sizder shyǵarǵaly otyrǵan on tomǵa kirýi, sıfrly úlgide jarııalanýy – qazaq tarıh ǵylymy úshin iri oqıǵa. О́ıtkeni, zertteýge qajet materıaldardy muraǵatta shań jutpaı, úıde otyryp-aq qaraýǵa bolady. Al qazirgi «Egemendi» qarap otyryp búgingi tarıhymyzdy bilemiz, keleshegimizdi baǵamdaı alamyz. Máńgilik eldiń aınasy bolatyn gazet – osy. Jas jýrnalıster «Egemenniń» betinde jıi kórine bersin. «Egemenge» jastardyń jigeri men batyldyǵy da kerek dep oılaımyn. Qaırat Saq, Eýrazııa ulttyq ýnıversıteti jýrnalıstıka jáne saıasattaný fakýltetiniń dekany: «Jýrnalıstıka eldiń tarıhyn jazady. «Egemen Qazaqstannyń» júz jylǵy tarıhyndaǵy materıaldardy joǵalýdan, kómeskilenýden saqtaý – baǵa jetpes eńbek. Jáne bul bizdiń jýrnalıstıka fakýlteti úshin de asa mańyzdy. Stýdentter bul joba arqyly qazaq jýrnalıstıkasynyń tarıhymen keńinen tanysady, birneshe ondaǵan jyldar buryn jazylǵan maqalalardy taldaıdy, olar arqyly tarıhymyzdyń mańyzdy kezeńderin tereńirek biledi».