Qarjy pıramıdasyn qurǵan áıel 3 jylǵa bas bostandyǵynan aıyryldy

Jezqazǵanda qarjy pıramıdasyn quryp, 50 azamatty san soqtyrǵan áıel 3 jylǵa bas bostandyǵynan aıyryldy. Bul týraly Jezqazǵan qalalyq soty habarlady. Qalalyq sottyń habarlaýynsha 44 jastaǵy Saıagúl Nurmanova qala turǵyndarynyń 8,5 mln teńge qarjysyn alaıaqtyqpen alǵan. Qylmystyq istiń materıaldaryna sáıkes, kásipker áıel onyń «Senim» atty fırmasyna salǵan qarjyny eki ese etip qaıtarýǵa ýáde etken. «Kásipker salymshylarmen resmı kelisimshart jasasqan. Ol klıentterdiń birinshi bóligine negizgi soma men paıyzdy tóleı otyryp, senimge ıe bolǵan», - dep habarlady Jezqazǵan qalalyq soty. Úsh aıdyń ishinde 8 mıllıon 500 myń teńge jınaǵan Saıagúl Nurmanova klıentterine qarjy qaıtarýdy doǵarady. Ol barlyǵy 45 mıllıon teńge jınaǵan. Osy somanyń ishinen 8,5 mıllıon teńgeni adamdarǵa qaıtarmady. Salymshylar Jezqazǵan qalalyq IIB-ǵa barady. Polısııa qyzmetkerleri ony QR QK 217-baby «Qarjylyq (ınvestısııalyq) pıramıdany qurý jáne oǵan basshylyq etý» boıynsha kúdikti dep tabady. «Jezqazǵan qalalyq sotynyń sýdıasy Marat Bekjanov kúdiktini QR QK 217-baby «Qarjylyq (ınvestısııalyq) pıramıdany qurý jáne oǵan basshylyq etý» boıynsha aıypty dep taýyp, úsh jylǵa bas bostandyǵynan aıyrdy», - dep habarlady Jezqazǵan qalalyq soty. Sonymen qatar, sot qylmyskerdi jábirlenýshilerdiń qarjysyn qaıtarýǵa mindettedi.