Qazaqstannyń Brazılııadaǵy Tótenshe jáne ókiletti elshisi Qaırat Sarjanov osy eldiń memlekettik organdar qyzmetkerlerine, akademııalyq, qoǵamdyq jáne iskerlik toptar ókilderine, Latyn Amerıkasy memleketteri elshilikteriniń dıplomattaryna Memleket basshysy Nursultan Nazarbaevtyń «Qazaqstannyń Úshinshi jańǵyrýy: jahandyq básekege qabilettilik» atty Joldaýynyń negizgi qaǵıdalaryn túsindirý boıynsha brıfıng ótkizdi.
Q.Sarjanov usynylǵan ekonomıkalyq Úshinshi jańǵyrýdyń jańa jospary tek qana jahandyq syndar men qaterlerge qarsy kúres boıynsha mindetter emes, bolashaq ekonomıkalyq ósýdiń berik kópiri ekenin atap kórsetti. Sondaı-aq, ol Memleket basshysy belgilegen ekonomıkany reformalaý men jańǵyrtý jáne Qazaqstannyń jahandyq básekege qabilettiligin qamtamasyz etý boıynsha 5 basymdyqtarǵa ekpin berdi.
Brıfıngke qatysýshylar ekonomıkalyq jańǵyrýdyń mańyzdy qujat ekenine nazar aýdardy. Olardyń paıymdaýynsha, jedel tehnologııalyq jańǵyrý jónindegi jospardyń sátti iske asyrylýy el damýyna erekshe serpin bermek. Máselen, Brazılııa Ulttyq kongresiniń burynǵy depýtaty, «Uniao Planetaria» (Brazılııa planetarlyq odaǵy) uıymynyń basshysy, «TV-Supren» telearnasynyń prezıdenti Ýlısıs Rıdel, Brazılııa ýnıversıteti Halyqaralyq qatynastar ınstıtýtynyń professory Alsıdıs Vaz Joldaýdaǵy basymdyqtardyń oryndalýy Qazaqstandy álemdegi asa damyǵan 30 eldiń qataryna qosatynyna senimdi ekendikterin bildirdi.
