Táýelsizdik – Máńgilik El muraty

Qazaqstan Respýblıkasynyń Táýelsizdigi kúni – memleketimiz ben halqymyz úshin eń basty ári qundy mereke. Bul kúnge san ǵasyr boıy armandap jettik. Sóıtip, 25 jyl ishinde elimizdi álemniń órkenıetti memleketteriniń qataryna qostyq. Táýelsiz Qazaq elin qalyptastyryp, naryqtyń qıyn kezeńderinen de aman ótip kelemiz. Qazaqstandy dúnıe júzi tanıtyndaı, syılaıtyn­daı deńgeıge jetkizýde Tuńǵysh Pre­zı­dentimiz – Elbasy Nursultan Ábishuly Nazarbaevtyń eńbegi zor. Barsha qazaqstandyqtar úshin Táýelsizdiktiń máni de, mańyzy da aıryqsha. Sebebi, jer betindegi árbir ult úshin táýelsiz el bolý – uly arman. Dúnıe júzinde 6 myńǵa jýyq ulttar men ulystar bar bolsa, solardyń ishinde 200-deıi ǵana táýelsiz memleket bolyp tabylady. «Qazaqstan Respýblıkasynyń Memlekettik táýelsizdigi týraly» tarıhı qujatqa deıin elimiz táýelsizdikke aparar birneshe mańyzdy qadamdar jasady. Sonyń ishinde 1990 jylǵy 25 qazanda «Qazaq KSR-iniń Memlekettik egemendigi týraly» Deklarasııa qabyldandy. Bul qujat arqyly táýelsizdigimizdiń quqyqtyq jáne ıdeologııalyq negizderi qalandy. Nátıjesinde, 1991 jyldyń 16 jeltoqsanynda elimizdiń Táýelsizdigi týraly zań qabyldandy. Osylaısha álem kartasynda  Qazaqstan atty jańa memleket paıda boldy. Osy jyldar ishinde elimizde kóptegen ońdy ister atqaryldy. Atap aıtsaq, tarıhı jerimizdiń shekarasy, elimiz egemendiginiń tuǵyry bekitilip, ekonomıkasy men syrtqy saıasaty qalyptastyryla bastady. Memlekettik rámizderimiz, Ata Zańymyz, ulttyq valıýtamyz jáne Saryarqanyń keń jazyq dalasynda jańa Astanamyz dúnıege keldi. Álemdik qoǵamdastyq aldynda «Qazaqstan Respýblıkasy» degen asqaq rýhty el ornaǵanyn moıyndattyq. Ekono­mıkamyz da jyldan-jylǵa nyǵaıyp, máde­nı, rýhanı damý deńgeıi beles­ke kóterilýde. Sóıtip, Qazaqstan búgin­de ózine tán barlyq ınstıtýttary bar álemdik qoǵamdastyqtyń yq­pal­dy múshesine aınalyp úlgerdi. 25 jyl memleket úshin kóp ýaqyt emes, biraq osy az ǵana ýaqytta Qazaqstan óz aıaǵyna nyq turyp, álemge aty tanylǵan memleket boldy. 25 jyl ishinde Qazaqstan 70-ten astam halyqaralyq uıymnyń beldi múshesi atandy. Astanada EQYU sammıtin uıymdastyryp, óz jerinde Azıada ótkizdi. Esik qaǵyp turǵan jyly elordamyzda EKSPO halyqaralyq kórmesi men Almaty qalasynda qysqy Ýnıversıada sııaqty mańyzdy sharalar jalaý jelbiretetin bolady. BUU turaqty emes músheligindegi qyz­meti­mizdiń alǵashqy jyly da bastalǵaly tur. Egemen damýdyń 25 jyly ishinde Qazaq­­stan álemniń eń damyǵan 50 eli­niń qataryna enip, «Qazaqstan-2030» Stra­tegııa­syn merziminen buryn iske asyrdy. Búginde «Qazaqstan-2050» Strategııasynyń oryndalýyn jedeldetetin «100 naqty qadam: barshaǵa arnalǵan qazirgi zamanǵy memleket» Ult josparyn júzege asyra bastadyq.  Bul baǵdarlamalardyń oryndalýy «Máńgilik El» jalpyulttyq ıdeıasyn júzege asyrýǵa, ıaǵnı qazaqstandyq armanǵa qol jetkizýge jaqyndata túsedi. Qazaqstan – búginde Táýelsiz Memleketter Dostastyǵy elderiniń arasynda jańǵyrý men damýdyń kóshbasshysy. Memleketimizdiń egemendigin álemniń 120-dan astam memleketi resmı moıyndaǵan. Qazaqstan BUU-nyń tolyq quqyly belsendi múshesi, sonymen qatar ol yntymaqtastyǵyn Eýroodaq, Eýropa qaıta qurý jáne damý banki, Halyqaralyq valıýta qory,  MAGATE, Qyzyl Jarty Aı, IýNISEF pen IýNESKO syndy beldi uıymdarmen yqpaldasa otyryp nyǵaıtýda. Qazaqstan 400-den astam kópjaqty jáne 700 ekijaqty kelisimge qol qoıǵan. Eýropadaǵy qaýipsizdik jáne ynty­maqtastyq uıymyndaǵy tóraǵalyq, Astana sammıti, Islam Yntymaqtastyǵy Uıy­myndaǵy, Shanhaı yntymaqtastyq uıymyn­daǵy, Eýrazııalyq ekonomıkalyq odaqtaǵy tóraǵalyq – bular Elbasy N.Á.Nazarbaevtyń salıqaly saıasatynyń arqasynda qol jet­kizilgen orasan zor jetistikter. Elbasy Nursultan Nazarbaevtyń kóregendiginiń, oǵan degen halyqtyń seniminiń arqasynda elimizde birlik pen yntymaq saltanat quryp, osyndaı úlken jetistikke jettik jáne muny álem tanyp otyr. Bizdiń qasıetti de qasterli Máńgilik elimizdiń jolynda qazaqstandyqtardy al­da áli de kóptegen jańa tabystardyń kútip turǵany taǵy anyq. Qazirgi ýaqytta memlekettiń jastarǵa jasap jatqan qoldaýy da aıtarlyqtaı. Tek sony utymdy paıdalaný kerek. Memleketimizdiń bolashaq órkendeýi, damýy, gúldenýi ımandy, bilimdi onyń ishinde memlekettik tildi biletin, barlyq halyqtardyń dástúrlerin qurmetteıtin jigerli jastarǵa baılanysty. Jańa zamandaǵy ǵylymnyń jetistiginen tolyq habardar jastarymyz memleketimizdiń kósh bastaýshysy, ilgeriletýshisi bolyp qalyptasýy kerek. Bolashaǵymyzdyń sonda ǵana baıandy bolatyny aıtpasa da túsinikti. Nursultan BAITILESOV, Qazaqstan Respýblıkasy Áskerı sottar ákimshisiniń basshysy