Alystaǵy, sonaý jastyq shaqta áskerı boryshty ótep qaıtqan soń baıaǵy eldiń aýzyn baǵasyń. Eki-úsh týyndyny qoımastan aıtyp, tańyrqaý aralas súısinister búkil yqylas-peıildi sol kitaptarǵa aýdaryp, qolyńa alǵansha taǵatyńdy taýysyp bitken edi. Desi júrip turǵan ánshilerdiń qazirgi zamanyndaı jazýshylardyń juldyzy ol ýaqytta joǵary. «Abaı joly» epopeıasy tolyq jaryq kórgen dáýirde balasyń, bala da bolsań bálesiń, halyqtyń kóńil kúıi kóterilip, mereıi ústem bola túskenin sezesiń. Dál mundaı jaǵdaı úzilmeı jalǵasyn taýyp, máńgige ornyqqandaı kóringen.Orta mektepti bitirerdiń aıaq shenine taman «Qan men terdiń» alǵashqy tomdary qolǵa tıip, sonyń áserinen biraz ýaqyt aıyǵa almaǵanymyz da este. Qolyna qalam ustaǵandar qudaıdyń nazaryna erekshe túsken bólekshe jaratylys ıelerindeı qyzyǵa da qyzǵana qaraıtyn qaıran sol aýsar shaq-aı.
Sharttylyǵy basym keıbir týyndylarda myń-san suraqtarǵa júrek qozǵaıtyn jaýap joqtaı. Solardy aýyzdarynan sýy quryp maqtaǵan kópshilik talǵamynda da aqaý bar ma, kemshilikteri kórineý tursa da baıqamaǵandary qalaı? «Shýyldaqtardan» aıyrmań shamaly halde ýaqyt shirkindi eleýsiz ótkerip jiberip, sondaǵy mazany qashyrǵan jaılardyń jaýabyn kútpegen jerden keziktirgenińe meıliń qaıran qal, meıliń qaıran qalma, der kezinde ańǵara almaǵan soryń da baıaǵy.
Talǵam degen jaryqtyqty únemi jetildirip, rýhanı tájirıbeni tolyqtyrý ústinde ózińdi sergek ustamasań – baıqampaz qasıetiń qalǵyp ketetini haq eken. Ásker qatarynda júrip áldeqalaı qolymyzǵa tıgen «Mahabbat, qyzyq mol jyldar» romanyn bir demmen oqyp shyǵyp, bolashaq jaryńdy jastyq qulshynyspen armandaǵanyń bar emes pe. О́mirge osynaý ustanymmen aralasa bastaǵan kezde synshy Baqyt Sarbalaevtyń sol kitap týraly jazǵan pikiri jańsaq ta ádiletsiz kórinip edi. Alǵashqy áser arqyly aqı-taqı tórelikke barý qaýipti-aý. Osy jasqa deıin sabyr, aıal qylmastan aıtyp qalǵan oıyń dúmbilez, toqtamyń shala-sharpy bolsa – bireýdi kinálaý orynsyz. Úmit etken jasyń ıneniń kózinen ótken pysyq, ıa urma-perme esersoq minez ıesi bolsa – uıaty ózińe keledi.Talantty taný men batagóı úlkendik mádenıetiniń qazirgi qalyptasqan jaǵdaıyna qarasań – jylap jiberýdiń o jaǵy men bu jaǵynda eriksiz turasyń. О́ziń týraly táýir lebiz jarǵan kisiń ákeń jasamaǵan jaqsylyqty úıip-tógip tastaǵandaı mindetsinse meıli ǵoı. Shalys basyp, jazataıym múlt kete qalsań – keshirilmes kúnáǵa batqandaı teris batasyn berýden taıynbaıdy. Ádebı úderis ústinde ne kórip, ne qylmaǵan bas bul. «Mendeı jazýshy qazaqta áli týa qoıǵan joq. Oralhan Bókeevtiń qarasy kórinip qalyp edi, orta jolda ol da ólip tyndy» degen aqsaqal jasyndaǵy kisiniń ajarynda qylaıa qymsynýdyń qyldaı belgisi sezilip qoısa she. Osynaý shalyqty sózderdiń ıesi teledıdarda ózin kisilikti de kishik ustap, bııazy, bıpaz sóılegenin kórgende sener-senbesińdi bilmeı daǵdaratynyń bar.
Kórkem oıdyń álemdik qazynasyna qulashtap boılap, sheberlik sıqyryn jetik meńgergen perzentterimiz qatarynyń qarasy moldaý. Olardyń boıynan álgindeı ıneniń jasýyndaı maqtannyń osaldyǵyn kórsetpeıtinderine qaıran qalasyń. Jazýdyń sáttiligi sporttyq jattyǵýdyń beınet soryn belsheden keshkennen keıin qaıtalanatyn qubylys qana emes. Keıipkerge kelý turǵysynda kesek minezdi taǵdyr ıesi áýeli kókeıge qonaqtady. Onyń kórkem eseıý úderisi oıda úzbeı jalǵasqannan keıin baryp qorytylýy tıis. Sóz ıesiniń bul jerdegi qanaǵat raqymy esep emes. Oqýshynyń synshyl súzgisinen ótip, qadaý-qadaý ólshemder aqyrynda taǵdyrsheshti aqıqattan quralady. Qazaqtyń rýhanı ahýalynda aqıqat ustanymynyń asqaqtyǵy qazir azdaý. Keýdemsoq jyryndy pysyq qoltańba Áýezov qubylysyna barabar baǵalanǵan jaǵdaıǵa dýshar bolǵannan keıin osyndaı toqtamǵa eriksiz kelesiń. Sonaý jastyq shaqta kópshilik asa jyly qabyldaǵan álgi úsh týyndynyń sharttylyqqa toly sheshimderine Saǵat Áshimbaev kezinde aıanbaı shúıilipti.
Saǵat Áshimbaevtyń siltese tilip túsetin synshylyq semser sózi qazir qazaqqa aýadaı qajet-aý.
