Shyǵarmashylyq keshke ulttyq mádenı ortalyqtardyń ókilderi, joǵary oqý oryndarynyń oqytýshylary men Máskeýde bilim alyp jatqan qazaq stýdentteri qatysqan.
Sahna tórinde aqynnyń óleńderi oqylyp, Qazaqstannyń eńbek sińirgen qaıratkeri, ánshi Sáýle Janpeıisova jáne tanymal ánshi Roza Álqoja syndy ánshilerdiń oryndaýynda birneshe áni shyrqaldy, keshke aqynnyń qyzdary Saltanat, Mahabbat, Qusnı, Aınar qatysty.
«Baıtaq mekenim» qoǵamdyq qorynyń tóraǵasy Sábıt Toqymbetovtiń aıtýynsha, aqynnyń shyǵarmashylyǵyn zertteýdi qolǵa alý maqsatynda ótken jyly 22 aqpanda Aqtaý qalasynda bastaý alǵan «Ata jurtyn ańsaǵan Aıbergenov» atty birinshi ǵylymı-teorııalyq konferensııa ótkizilip, sol jyly qazan aıynyń 14-shi juldyzynda Shymkent qalasynda bir top kásipkerlerdiń qoldaýymen «Tólegen Aıbergenov ańsaǵan álem» atty halyqaralyq ǵylymı-tájirıbelik konferensııamen jáne Jazýshylar odaǵyndaǵy ádebıetshiler úıinde «Tólegen Aıbergenov poezııasy jáne qazirgi zaman» atty úshinshi halyqaralyq ǵylymı-tájirıbelik konferensııamen jalǵasqan. Aqtaý men Shymkentte ótken konferensııanyń materıaldary kitap bolyp shyqsa, Almatyda ótken konferensııa týraly tolyqqandy maǵlumat jýyq arada jańa kitap bolyp shyǵady dep kútilýde.
Aqynnyń 80 jyldyǵynyń qorytyndy keshi Astana qalasynda bıyl 22 jeltoqsanda ótedi dep josparlanyp otyr.
– Tólegen Aıbergenovtiń esimi el jadynda máńgi saqtalyp qalary sózsiz. Qaı qalaǵa barsaq ta, aqynǵa degen qurmet erekshe. Osyndaı aýqymdy shara bıyl Aqtóbe oblysy, Baıǵanın aýdanynda ótken edi. Sonymen qatar, Besqalanyń Nókis qalasyndaǵy Berdaq atyndaǵy ýnıversıteti men Ájınııaz atyndaǵy pedagogıkalyq ınstıtýtynda, aqynnyń kindik qany tamǵan «Tań nury» aýylynda da shyǵarmashylyq kesh ótti. Sharaǵa tanymal aqyndar Qasymhan Begmanov jáne Baýyrjan Babajanuly men aqynnyń urpaqtary túgel qatysty. Bul rette Aıbergenovtiń shyǵarmashylyǵyn nasıhattaýda Qońyrat aýdanyndaǵy Tólegen Aıbergenov atyndaǵy orta mektep dırektory Jetkizgen Sársenbaev degen azamattyń eleýli úles qosqanyn aıtyp ótkenimiz jón, deıdi «Baıtaq mekenim» qoǵamdyq qorynyń tóraǵasy Sábıt Toqymbetov.
Sondaı-aq, belgili bolǵandaı aqynnyń keıbir óleńderi buǵan deıin orys tiline aýdarylsa, bıyl túrkııalyq ǵalym Oǵyz Doǵan túrik tiline, Bulbul Mataı qytaı tiline, Bahodır Ýbaıdýllaýǵly ózbek tiline aýdarýdy qolǵa alǵan. Al, aldaǵy ýaqytta Shymkent qalasynda Tólegen Aıbergenov atyndaǵy ǵylymı-zertteý ortalyǵyn ashý josparlanyp otyr.
Kózi tirisinde zańǵar jazýshy Ábish Kekilbaev «Bizdiń qolymyzda qalǵan bir-eki juqa kitap – T. Aıbergenov talantynyń shalqar darııasy emes, asaý arnanyń basy ǵana edi. Onyń kók telegeı kól bolyp shalqýyn kórýdi taǵdyr bizdiń mańdaıymyzǵa jazbapty» dese, ózge de belgili aqyndar Tólegen týraly jaqsy lebizderin arnaǵan. О́leńimen ózine máńgilik eskertkish soqqan aqyn esimi halqynyń júreginde, al onyń óleńderi halqynyń jadynda saqtaýly kúıinde jurtymen birge jasap keledi.
Gúlaıym ShYNTEMIRQYZY,
«Egemen Qazaqstan»
Mańǵystaý oblysy
