«Eýrazııa» sport kesheniniń alańynda ótetin birinshilikke elimizdiń barlyq iri buqaralyq aqparat quraldary qatysady.
«BAQ league» 2016 jyly «Astana fýtbol federasııasy» zańdy tulǵalar birlestiginiń qolǵa alǵan jobasy. Birinshi maýsym 2016 jyldyń 10 jeltoqsanynda bastalyp, 2017 jyldyń 26 aqpanyna deıin sozylǵan. Oǵan 11 komanda qatysty. Birinshi oryndy «Habar» alsa, ekinshi oryndy «Qazaq radıosy» jeńip alyp, úzdik úshtikke sportsffa.kz saıtynyń komandasy ilikken. Ekinshi maýsym 2017 jyldyń mamyr aıynda bastalyp, 14 komanda ár senbi jáne jeksenbi saıyn «Tarlan-Arena» sport kesheninde ózara kezdesip, tamyz aıyna deıin jalǵasqan birinshilikte «Habar» komandasy ózderiniń chempıondyq ataqtaryn qorǵap qaldy. Ekinshi oryndy «Elorda aqparat» agenttigi enshilese, «Astana» telearnasy úzdik úshtikten kóringen. Sondaı-aq, «habarlyqtar» altyn dýplet jasap, Jýrnalıster kýbogyn da jeńip alǵan», dedi BAQ league jobasynyń jetekshisi Ázız Jumadil.
Endi BAQ league birinshiliginiń úshinshi maýsymy 25 aqpanda bastalyp, 27 mamyrǵa deıin jalǵasady. Oıyndardyń barlyǵy «Eýrazııa» sport kesheninde ótedi. Maýsym qorytyndysy boıynsha úzdik segiz komanda kelesi maýsymda Joǵarǵy lıgany qurasa, tómengi oryndardan kóringen komandalar Birinshi lıgada baq synaıdy.
Spıkerlerdiń sózinshe Jýrnalıster lıgasynyń úshinshi maýsymyna qatysýǵa 14 komanda ótinish bildirgen. Olardyń arasynda «Habar» telearnasy, «Astana» telearnasy, «Habar 24» telearnasy, «Qazaq radıosy», «Sport» gazeti, «Egemen Qazaqstan» gazeti, «Qazsport» telearnasy, QR AKM TAO komandasy, «Qazmedıa» ortalyǵy, «Qazaqstan» ulttyq arnasy, qazaqinfo.kz saıty, «Evrazııa» telearnasy, «Asyl Arna» telearnasy, «Qazaqstan ulttyq arnasynyń aqparattyq-saraptamalyq baǵdarlamalar dıreksııasy» bar.
Baspasóz máslıhatynan keıin jerebe tartý rásimi ótip, Jýrnalıster lıgasynyń oıyndar kestesi belgili bolady.
Raýan QAIDAR,
«Egemen Qazaqstan»
