Olardyń tutqynnan qashyp shyǵyp kele jatqan beti eken. Birinshisi – eńgezerdeı, taý tulǵaly jigit te, ekinshisi – shynashaqtaı kózinen ot shashqan bireý eken. Bógenbaı batyr, shynashaqtaı sarbazdan: «Oırattyń tutqynynda qansha ýaqyt boldyń?» dep surapty. Anaý: «Eki aı tutqynda boldym», depti. Bókeń batyr: «Myna jigittiń qolyna qylysh ustatyp, jaý shebin buzatyn mańdaı qosynǵa jiberińder!» depti. Eńgezerdeı batyr jigitten: «Al, sen tutqynda qansha boldyń?» dep suraıdy. Anaý: «Úsh jyl jattym» depti. «Onda mynanyń qolyna quryq berip, jylqy baǵýǵa jiberińder!» depti Bókeń.
Oqıǵaǵa kýá bolyp otyrǵan basqa batyrlar: «Bóke, áne bireý shynashaqtaı tapaldy jortýylshy qosynǵa jiberdińiz de taý tulǵaly batyr jigitke jylqy baqtyryp qoıdyńyz, bul ádildik pe?» dep suraıdy. Bókeń jaryqtyq: «Anaý shynashaqtaı jigit tutqynda eki-aq aı bolypty, áli rýhy synbaǵan eken. Qalmaqtardan taıaq jep, óshpendiligi betine shyqqan, naǵyz zor kúıinde tur. Sol sebepti tańdaýly qosynǵa jiberdim. Qalmaq kórinse qasqyrdaı shabaıyn dep tur. Al taý tulǵaly batyrlaryń úsh jyl tutqynda jatypty, qalmaqtan ábden taıaq jegen, rýhy synyp, quldyq ótip ketipti. Kózine qalmaq kórinse jata keteıin dep tur. Sondyqtan oǵan jylqy baqqannan basqa jumys joq», depti.
Beken QAIRATULY,
«Egemen Qazaqstan»
