Úkimettiń baspasóz ortalyǵynda ótken brıfıngke «Samuryq-Qazyna» AQ operasııalyq qyzmet jónindegi basqarýshy dırektory Álisher Pirmetov, Satyp alý metodologııasy qyzmetiniń basshysy Muhıt Magajanov, Jurtshylyqpen baılanys departamentiniń dırektory Sergeı Kýıanov, «Samuryq-Qazyna Kontrakt» JShS bas dırektorynyń orynbasary Bolat Jumaǵalıev qatysty. Jıynda «Samuryq-Qazyna» UÁQ-tyń» satyp alý júıesin jetildirý jaıy sóz boldy.
«Samuryq-Qazynanyń» satyp alý qyzmetin jetildirý satyp alýlardy baqylaýdyń barlyq salalaryna qatysty. Osyǵan baılanysty kameraldy baqylaý engizilip, onyń aıasynda táýekelder beıini anyqtalady. Avtomattandyrý óziniń maqsatyna saı táýekelder beıinin qadaǵalap otyrýǵa septigin tıgizedi. Búgingi kúni jumys istep turǵan «Tender SQ» júıesi táýekelderdiń shamamen 18 paıyzyn qadaǵalaı almaıdy. Al jańadan engiziletin júıe táýekelderdiń jartysynan astamyn qamtıdy», dedi jıynda «Samuryq-Qazyna Kelisimshart» JShS bas dırektorynyń orynbasary B.Jumaǵalıev.
Málim bolǵandaı, elektrondy satyp alýlardy júzege asyratyn jańa portal bıylǵy jyldyń shilde aıynda iske qosylady. Qazaqstandyq kompanııa qurastyrǵan portalda taýar, jumys jáne qyzmet qajettiligin josparlaýdan bastap, satyp alýdy ótkizý, sharttardy bekitý jáne iske asyrýǵa deıingi barlyq kezeń oryndalady. Satyp alý barysynyń bir platformada júzege asyrylýy – qorǵa onlaın tártipte tıisti prosedýralarǵa saraptama júrgizýge, sapaly jáne birtutas taldaý jasaýǵa, qatelikterdi anyqtaýǵa, jetkizýshiler tarabynan túsken shaǵymdarǵa jedel áreket etýge múmkindik beredi.
Elektrondy satyp alýdyń jańa alańy tapsyrys berýshiler men jetkizýshilerge elektrondy platformany qoldaný kezinde qolaıly jaǵdaılar jasaıdy. Bul óz kezeginde elektrondy alańdy súıemeldeý shyǵyndaryn qysqartyp, satyp alýdyń ashyqtyǵyn Blockchain tehnologııasy arqyly qamtamasyz etedi. Búginde satyp alý erejeleriniń negizgi talaptary jáne normalary boıynsha 117 «táýekel beıini» ázirlengen jáne belgilengen, krıterııleri anyqtalǵan jáne táýekelderdi baǵalaý naqtylanǵan. Iske qosylatyn júıe 77 táýekel beıinin qamtýǵa múmkindik beredi. Bul jalpy kólemniń 65 paıyzdan astamyn quraıdy. Qalǵan 34 paıyzdan astamy kameraldy baqylaý arqyly saraptalady. Máselen, eger tapsyrys berýshi satyp alý kezinde satyp alý erejesin buzsa, onda júıe avtomatty túrde osy sekildi «táýekelderdi» buzýshylyqtar túri boıynsha tıisti faılda saqtaıdy jáne olardy qarastyrý úshin qordyń satyp alý máseleleri jónindegi ýákiletti organyna jiberedi.
Dınara BITIK,
«Egemen Qazaqstan»
