Foto: checkrx.ru
Júıe oıdaǵydaı iske asar bolsa dertine daýa izdegen jandar qaptaǵan qaǵaz jınap bas qatyrmaıdy. Bul emdelýshige de, em berýshige de tıimdi. Dárigerler ambýlatorııalyq kartalar, syrqatnamalar men reseptterdi burynǵydaı qolmen jazbaıdy. Birden kompıýterge engizedi. Osylaısha, ýaqyt talabyna saı kez-kelgen azamattyń densaýlyǵyna qatysty tolyqqandy málimetter kompıýterde saqtalady. Kezekti tómendetý úshin emhanalarda dárigerdiń qabyldaýyna jazylý tásili odan ári ońtaılandyryla túspek. Oǵan qosa qala ortalyǵynan shalǵaı ornalasqan yqsham aýdandarda budan bylaı jyljymaly jedel járdem modýly qyzmet atqarady. Sıfrlandyrý baǵdarlamasyn júzege asyrýǵa jergilikti bıýdjet esebinen 1 mlrd 339 mln teńge bólingen. Jaýapty mamandardyń sózinshe, Densaýlyq saqtaý salasyn sıfrlyq jańǵyrtý maqsatynda jyl sońyna deıin medısınalyq uıymdardyń barlyǵy aqparattyq júıelermen tolyqtaı qamtamasyz etiletin bolady. Bul maqsatta atqarylyp jatqan sharýalar tizbegi de aýqymdy. Qaladaǵy barlyq medısınalyq uıymdar 100 paıyz kompıýterlik tehnıkamen qamtylyp, salaǵa 120 IT-maman tartylǵan. Oǵan qosa Ákimdik pen Densaýlyq saqtaý mınıstrligi arasynda jasalǵan memorandýmǵa sáıkes jyl saıyn jergilikti bıýdjet esebinen kompıýterlik tehnıkalar 20 paıyzǵa jańartylyp otyrady.
Jıynda aıtylǵan sandardy saralar bolsaq, ótken jyl birqatar jaǵymdy nátıjelermen aıaqtalǵan. Qala turǵyndary densaýlyǵynyń negizgi ındıkatorlarynyń oń dınamıkasy baıqalady. Máselen, náreste ólimi – 7 paıyzǵa azaısa, týberkýlezden keletin ólim sany – 8 paıyzǵa tómendegen. Bul rette jazataıym oqıǵalardan, jaraqattardan jáne ýlanýdan bolatyn ólim kórsetkishi – 21 paıyzǵa, qaterli isikten bolatyn ólim – 7,5 paıyzǵa, semizdiktiń taralýy – 24 paıyzǵa, esirtkige táýeldilikten norkologııalyq esepte turatyndar sany – 17 paıyzǵa azaıǵan.
– Halyqqa memlekettik qyzmetterdi kórsetý barynsha jetildirilip keledi. «Elektrondyq úkimet» portaly arqyly elektrondyq nysanda kórsetilgen memlekettik qyzmetter sany 14,4 esege ósti. Bir turǵynǵa shaqqanda elektrondyq nysanda kórsetilgen memlekettik qyzmetterdiń sany 15 esege deıin artyp otyr. Byltyr 230 myń naýqasty tegin dárimen qamtamasyz etý úshin respýblıkalyq jáne jergilikti bıýdjetten 13 mlrd 314 mln teńge bólingen. Onyń ishinde 465 mln teńge sırek kezdesetin dertke shaldyqqan naýqastarǵa berildi. «Densaýlyq» memlekettik baǵdarlamasyn iske asyrý 73 is-shara boıynsha júzege asyryldy, olardyń ishinen 23 is-shara osy jyly merziminde aıaqtaldy. Memlekettik baǵdarlamanyń is-sharalary 17,7 mlrd.t. somada qarjylandyryldy jáne qarajattar tolyqtaı ıgerildi, - deıdi Almaty qalalyq Densaýlyq saqtaý basqarmasynyń basshysy Serikbol Mýsınov.
Aldaǵy ýaqytta derbestendirilgen medısınany engizý boıynsha genetıkalyq sekvenırlaý, bıomedısınalyq ınformatıka jáne jasandy ıntellekt arqyly jumys, aýrý sebebi shyqqanǵa deıin dıagnozdy anyqtaý, emdeý boıynsha usynystar berý, maqsatty profılaktıkalyq sharalar josparlaý sııaqty birqatar múmkindikter artpaq. Pasıent pen dáriger arasyndaǵy baılanysty qamtamasyz etý úshin mobıldik qosymshalardy keńinen paıdalaný jumysy da basty nazarda.
Arman OKTIаBR,
«Egemen Qazaqstan»
ALMATY
