Barlyǵymyz biletindeı, jýyrda Iran Islam Respýblıkasynyń Ulttyq kitaphanasynda Qazaqstan ádebıeti jáne mádenıeti ortalyǵy ashylǵan bolatyn. Ortalyqty ashý jumystaryna belsene qatysqan shetel ádebıetteri ortalyǵynyń kitaphanashysy Saıran Rahymjanovanyń aıtýynsha, joǵarydaǵy yntymaqtastyqtyń alǵashqy jumysy retinde osy «Quran tápsir» biregeı qoljazbasyn qalpyna keltirgen. Alty aıǵa sozylǵan restavrasııa jumysy jýyrda aıaqtalyp, qundy qoljazba keshe ǵana Ulttyq akademııalyq kitaphanaǵa jetkizilgen. Sırek qoljazbalar qataryna jatatyn parsy tilindegi Qurannyń qoljazbasy kitaphanaǵa 2015 jyly jeke qordan kelip túsken. 800 betke taıaý qasıetti kitaptyń salmaǵy 9 keli.
Qundy jádiger aldymen ataqty Kembrıdj ýnıversıtetiniń ǵalymdary, atap aıtqanda «Shahname» Kembrıdj ortalyǵynyń parsy zertteýleri boıynsha jetekshisi Fırýza Melvıll men Charlz Petrdiń kózine túsip, olar «Quran tápsirge» «ǵylym álemindegi naǵyz sensasııaǵa aınalýy múmkin kitap» degen baǵa bergen. Ǵalymdar atalmysh qundy qoljazba grafıka-orfografııalyq, kodıkologııalyq saraptamany jáne restavrasııalyq jumystardy qajet etetinin aıtqan. Nátıjesinde, Irandaǵy Qazaqstan ádebıeti jáne mádenıeti ortalyǵy taǵy bir tarıhı jádigerdi oqyrmandar oljasyna qosyp otyr. Al keleshekte ulttyq akademııalyq kitaphanasynyń sırek kitaptar men qundy qoljazbalar kolleksııasy Kembrıdj ýnıversıtetiniń ǵalymdarymen jáne Qazaqstan ǵalymdary, sondaı-aq kitaphana qyzmetkerlerimen birlesip, halyqaralyq kodıkologııalyq uıymdarymen yntymaqtastyqta jumys jasaýdy josparlap otyr. Aıta keteıik, Iran Islam Respýblıkasy kitap mádenıeti damyǵan el retinde qoljazbany qorǵap qalýda uqyptylyqpen ter tókken. Kitapty tek qalpyna keltirip qana qoımaı, onyń elektrondy nusqasyn da qatty dıskige kóshirip, elordamyzdyń alda kele jatqan mereıtoıyna tartý etken.
Mıras ASAN,
«Egemen Qazaqstan»
