Bir apta buryn «Astana Arena» stadıonynda ótken kezdesýde «Astana» Roman Mýrtazaevtyń penaltıden soqqan jalǵyz golynyń arqasynda jeńiske jetken edi. Degenmen, bul esep fýtbol mamandarynyń boljamy bo-
ıynsha «Astana» úshin syrt alańda ótetin jaýapty match aldynda alańdarlyq nátıje bolatyn. Áıtkenmen 2014 jyldan beri Eýrokýbok oıyndarynda baq synap, birshama tájirıbe jınap úlgergen elordalyqtar keshegi kezdesýde jigerli oıyn kórsetip, Qazaqstanda soqpaǵan goldaryn Chernogorııada soqty. Birinshi taımnyń 38-mınýtynda Serikjan Mujyqovtan pas alǵan Djordje Despotovıch esepti ashsa, ekinshi taımnyń 65-mınýtynda Mujyqovtyń ózi gol salyp, qorytyndy esepti 2:0-ge jetkizdi.
Osylaısha eki kezdesýdiń qorytyndysy boıynsha 3:0 esebimen basym túsken «Astana» Chempıondar lıgasynyń ekinshi irikteý kezeńine joldama aldy. Bul synda «Astanany» Danııa chempıony «Mıtıýlland» komandasy kútip tur. Fýtbol jankúıerleriniń esinde bolsa, eýrododalarda 2001 jyldan beri turaqty synǵa túsip kele jatqan bul ujym 2015/16 jylǵy Eýropa lıgasynyń pleı-off kezeńinde Anglııanyń ataqty «Manchester Iýnaıted» komandasyn óz alańynda qabyldap, 2:1 esebimen basym túsken. Biraq qarymta kezdesýde «Mıtıýlland» 1:5 esebimen jeńilip qalǵan-dy. «Astana» – «Mıtıýlland» arasyndaǵy alǵashqy kezdesý 24 shilde kúni Astanada, qarymta match 1 tamyz kúni Danııada ótedi.
Aıta keteıik, «Astana» syrt alańda «Sýteska» komandasyn jeńgen soń ÝEFA klýbtar reıtınginde 57-orynǵa kóterilip aldy. Osydan týra bir jyl buryn elorda komandasy 79-orynda turǵan bolatyn.
Álı BITО́RE,
«Egemen Qazaqstan»
