Oblystyq «Soltústik Qazaqstan» gazetiniń bastamasymen byltyr «Tilim jatyr tamyrynan qyrqylyp, Janarymda jasym sodan tur tunyp.Týǵan jurtym qalmasyn dep irkilip, Jan júregim júr ǵoı meniń jyrtylyp» degen oramdy oılar, sergek sezimder, kesteli tilder molynan kezdesetin óleńder, pýblısıstıkalyq maqalalar toptastyrylǵan jınaq jaryq kórdi. Ol bilim alǵan M.Jumabaev atyndaǵy gýmanıtarlyq kolledjde «Til – qazyna» jobasy aıasynda dárishana ashyldy. О́miri men shyǵarmashylyǵy synyptan tys oqý sabaǵyna engizildi. Endi, mine eki múshel jasynda qyrmyzy gúldeı mezgilsiz solǵan jerlesimizdiń qurmetine uıymdastyrylǵan jas aqyndar músháırasy óz máresine jetip, qorytyndysy jarııa etildi.
– Jurtshylyqqa aldymen aıtysker aqyn, keıin otty jyrlarymen tanylǵan Nazgúl qysqa ǵana ǵumyrynda jasyndaı jarqyldap ótti. Minezi órshil, armany asqaq edi. Sum ajal aramyzdan beımezgil alyp ketkenine shırek ǵasyrdan astam ýaqyt ótse de, keshegideı kóz aldymyzda júrgen sııaqty, deı kelip, Qazaqstan Jazýshylar odaǵy jergilikti bólimshesiniń tóraǵasy, «Qyzyljar-Aqparat» JShS-niń dırektory Jarasbaı Súleımenov ádebı keshke jınalǵandarǵa tyrnaqaldy mádenı sharanyń jyl saıyn ótkiziletin dástúrge aınalatynyn, Maǵjan Jumabaev, Smaǵul Sádýaqasov, Safýan Shaımerdenov, taǵy basqa ult tulǵalaryna qatysty jobalardyń júzege asyrylyp jatqanyn jetkizdi. Qazaqstan Jazýshylar odaǵynyń múshesi, arqaly aqyn Zeınolla Ákimjanov, alǵashqy ustazdarynyń biri Bekturǵan Ramazanov, sińlisi Aıman Telmanqyzy, dárishana jetekshisi Lına Ysqaqova aqynnyń eshkimge uqsamaıtyn bolmys-bitimi, ultjandy qasıetteri jaıly esteliktermen bólisti.
Arnaıy komıssııa jyr báıgesine úkilep qosylǵan qyryqqa jýyq úmitkerdiń ishinen eń tańdaýlylaryn iriktedi. Birinshi orynǵa Á.Dosmuhambetov atyndaǵy oblystyq daryndy balalarǵa mamandandyrylǵan gımnazııa-ınternattyń oqýshysy Dılfýza Abdýkaıýmova laıyq dep tabyldy. Ekinshi oryndy pavlodarlyq Altynbek Maqsathan, úshinshi oryndy mamlıýttik Gúljamal Súleımenova ıelendi. Jeńimpazdar men júldegerlerge, óner ólkesine qadam basqan basqa da talapkerlerge de aqshalaı, zattaı syılyqtar tabys etildi. Jyr músháırasyn uıymdastyrýǵa belsene qatysqan ustazdar Bilim jáne ǵylym mınıstrliginiń Alǵys hatymen marapattaldy.
О́mir ESQALI,
«Egemen Qazaqstan»
Soltústik Qazaqstan oblysy
