Oblystyq energetıka jáne turǵyn úı-kommýnaldyq sharýashylyq basqarmasynyń basshysy Murat Iǵalıevtiń málimeti boıynsha turǵyn úı-kommýnaldyq sharýashylyq obektileriniń basym bóligi ortalyq jylýmen qamtamasyz etilgen.
- Bıyl Atyraý JEO júıelerine Balyqshy yqsham aýdanyndaǵy 47 kópqabatty turǵyn úı qosyldy. Alty úıdiń turǵyndary bul qyzmetten bas tartyp, gaz qazandyqtary arqyly jylý alady. Sondaı - aq, ortalyqtandyrylǵan jylýmen qamtamasyz etýge Nursaıa yqsham aýdanyndaǵy 27 kópqabatty turǵyn úı qosyldy, qalǵan 16 turǵyn úıdi kelesi jyly qosýdy josparlap otyrmyz, - dedi Murat Iǵalıev.
Tirshilikti qamtamasyz etý nysandaryn qysqy maýsymǵa daıyndaý úshin 8,4 mlrd teńge bólindi, onyń 5,8 mlrd teńgesi jergilikti bıýdjetten. Jylý jáne elektrmen qamtamasyz etetin kásiporyndar úlken jumys atqardy. Oblys boıynsha 22,78 shaqyrym jylýmen jabdyqtaý júıesi, 773,2 shaqyrym elektr jelileri, 3 shaqyrym sýmen jabdyqtaý jáne káriz júıeleri jóndeldi.
О́ńirdi sýmen jabdyqtaý júıesi boıynsha mańyzdy sheshim qabyldandy. Jaqyn arada bul júıeler «Atyraý Sý Arnasy» KMK-ne beriletin bolady.
- Nege biz mundaı sheshim qabyldadyq? Sý berýdi uıymdastyrý úshin senimdi basqarýǵa berilgen kóptegen obektiler tıisti túrde jumys istemeıdi. Turǵyndar qajetti kólemde sý ala almaıdy, sý jınaý uıymdastyrylǵan joq, paıdalanýda qıyndyqtar bar, jumysqa tehnıkalyq saýatsyz adamdar tartylady. Sondyqtan, sýmen qamtamasyz etý júıelerin «Atyraý Sý Arnasynyń» mamandandyrylǵan kásipornynyń teńgerimine berý týraly sheshim qabyldandy, - dep atap ótti Nurlan Noǵaev.
«Qaz TransGaz Aımaq» AQ Atyraý óndiristik fılıalynyń dırektory Maqsot Ábýov jylý berý maýsymyna daıyndyǵy týraly baıandap, gazben jabdyqtaý júıelerin paıdalaný qaýipsizdigi týraly másele qozǵady. Búginde óńirde gaz tehnıkalyq ınspeksııasyn qurý máselesi ótkir tur. Mundaı uıymdar elimizdiń birneshe oblystarynda ǵana jumys isteıdi. Bul máselede normatıvtik baza boıynsha nıýanstar bar, ıaǵnı óńirlerde osy qurylymdardy qurý prosesin sozady.
- Biz adamdardyń qaýipsizdigi týraly oılaýǵa tıispiz. Bul biz úshin eń bastysy. Al erteń tragedııa bolsa? Gaz tehnıkalyq ınspeksııany qysqa merzimde da qurý qajet. Eger zańnamalyq bazada problemalyq máseleler bolsa, biz máseleni depýtattar arqyly sheshýimiz kerek, - dep atap ótti oblys ákimi.
Keńeste sondaı-aq oblystyq jolaýshylar kóligi jáne avtomobıl joldary basqarmasynyń basshysy, «QazAvtoJol» Atyraý fılıalynyń ókili sóz sóıledi. Baıandamashylar qabyldanǵan sharalar týraly, jergilikti jáne respýblıkalyq aýqymdaǵy avtotrassalardaǵy qysqy kezeńge daıyndyq týraly aıtty.
- Sizdiń baıandamańyz boıynsha óńir qysqy merzimge daıyn dep sheshim qabyldaýǵa bolady. Ol qıyndyqtarsyz jáne tótenshe jaǵdaılarsyz ótýi tıis. Taǵy da eske salyp óteıin, turǵyndardyń qaýipsizdigi - bizdiń basty basymdyǵymyz. Barlyq qyzmetter tótenshe jaǵdaılar týyndaǵan kezde jedel jáne úılesimdi áreket etýi tıis, - dep qorytyndylady Nurlan Noǵaev.
