Oblys ortalyǵyndaǵy Orman jáne janýarlar álemin qorǵaý jónindegi mekemege qarasty Pavlodar, Jańaaýyl, Chernoresk, Iаmyshev, Chernoe jáne Kóktóbe ormanshylyqtary bar. Bir ormanshy qaramaǵyndaǵy 1 myń gektar alqapqa bas-kóz bolady. О́rtten, zańsyz aǵash kesýshilerden, ańshylardan qorǵaıdy. Orman jáne janýarlar álemin qorǵaý jónindegi mekemege qarasty aýmaqta ań aýlaýǵa tyıym salynǵan. Maqsat – óńirdegi orman qoryn qorǵaý, saqtaý, aǵashtardy ósirý, janýarlar álemin qorǵaý, olardyń ósimin kóbeıtýge úles qosý. Sondyqtan jergilikti ákimdik, tótenshe jaǵdaı, jergilikti polısııa, ormanshylyq basqarmasynan quralǵan oblystyq shtab qurylsa degen usynys aıtyp otyr ormanshylar.
Oblystyq jer qoınaýyn paıdalaný, qorshaǵan orta jáne sý resýrstary basqarmasynyń málimetinshe, bıyl óńirdegi Úrlitúp, Pavlodar, Lebıaji orman sharýashylyqtaryna órt sóndirý kólikteri, motorly qaıyqtar, traktorlar berilipti.
Qazir ormanshylar janýarlardyń azyǵyn daıyndaýǵa kirisip ketken. Olar jyl saıyn qys kelerde jabaıy janýarlarǵa qorek tasıdy. Tabıǵat janashyrlary jabaıy janýarlarǵa arnap jemshóp salatyn astaýlar ornatqan. Astaýlarǵa shóp, tuz salyp ketedi.
Ormanshylar jabaıy ań-qustardyń esebin de júrgizedi. Osy kórsetkish arqyly ań aýlaý lımıti belgilenedi.
– Janýarlarǵa qys kezinde qalyń qar astynan azyq tabý qıyn. Sondyqtan bıotehnıkalyq sharalar aıasynda 300 kılo tuz, aǵash butaqtarynan býyp jasalǵan 1600 dana azyq, 6 tonna shóp daıyndaldy. Kúzde jaýynnan, qysta aıazdan, borannan qorǵaıtyn kúrkeler jasaldy. Ańdardyń azyǵyna laıyqty kesilgen aǵashtardyń dińgekteri oıylyp, arnaıy astaýlar ilinip, jemshóp salynady, – deıdi ormanshylar.
Oblystyq Orman sharýashylyǵy jáne janýarlar dúnıesi aýmaqtyq ınspeksııasynyń málimetinshe, elimizde 2016 jyly kóktemgi ańshylyqqa tyıym salynǵannan keıin bıyl ótken jylmen salystyrǵanda óńirdegi qustardyń sany 20 paıyzǵa ósipti. Mysaly, úırek 1091300-ge, qaz 49965-ke, qasqaldaq 193130-ǵa, shil 49066-ǵa deıin jetipti.
Kóbeıgeni jaqsy-aq edi, bıylǵy jyldyń qyrkúıek-qazan aılarynda úırek, qaz, qasqaldaq, qur, balshyqshy qusyn, bódene men kógershin, qoıan, túlki, qarsaq aýlaýǵa ruqsat berilipti. Kúzgi ańshylyq maýsymynda óńirde 800-deı ańshy jabaıy qustar men ańdardy aýlaýǵa shyǵatyn kórinedi.
Iá, aıtsa aıtqandaı-aq, ań-qus, orman-toǵaı bizdiń baılyǵymyz. Ormanshylar bolsa ań-qustardyń qysta jeıtin azyǵyna deıin daıyndap berip, kúrkesin jasap, aıalap, qamqorlyq kórsetýde.
Farıda BYQAI,
«Egemen Qazaqstan»
PAVLODAR
