«Murat Móńkeuly murasy jáne týǵan jer ıdeıasy» taqyrybyndaǵy ǵylymı-tájirıbelik konferensııa H.Dosmuhamedov atyndaǵy
Atyraý memlekettik ýnıversıtetinde boldy. Bul kezdeısoq emes. Murat Móńkeulynyń shyǵarmalaryn alǵash zerttegen Halel Dosmuhamedov edi, ǵalym aqynnyń ádebı murasyn jınap, óz baǵasyn bergen. Ár jyldary ádebıettanýshylar, aqyndar men jazýshylar Murat shyǵarmashylyǵyn zertteýmen aınalysty. Konferensııaǵa qatysqan baıandamashylar Murat Móńkeulynyń ádebı murasy óskeleń urpaqty otansúıgishtikke baýlýda zor mańyzǵa ıe ekenin atap ótti.
- Búgingi konferensııa memleket basshysynyń «Bolashaqqa baǵdar: rýhanı jańǵyrý» baǵdarlamalyq maqalasy aıasynda uıymdastyrylyp otyr. Elimizdiń qalyptasýyna úlken úles qosqan tulǵalardy nasıhattaý maqsatymyz. Babalarymyz keń baıtaq qazaq jerin saqtap qaldy. Endi bizdiń mindetimiz jurtshylyqqa atalarymyzdyń erlik dastanyn, aqyn-jazýshylarymyzdyń shyǵarmalaryn nasıhattaý. Murat Móńkeuly Atyraý oblysynyń ár turǵynynyń júreginen oryn alady. Bizdiń aqynymyzdy, talantty aıtyskerimizdi bári bilýi kerek. Ýaqyttaryn bólip, osy sharaǵa qatysqan barlyq ǵalymdarǵa alǵys aıtamyn, - dedi Atyraý oblysynyń ákimi Nurlan Noǵaev.
